Tempu badak, SEJD Sei Realiza Akampamentu ICT Iha Manatutu

(Reportajen Asistente Editor Jacinto Caet)

DILI (Media ONE Timor) – Atu fó konesimentu ba joven kreatividade iha kada munisípiu, Sekretáriu Estadu Juventude no Desportu (SEJD), atraves husi Diresaun Nasionál Kreatividade Juventude sei realiza akampamentu Informasaun Komunikasaun Teknologia (ICT-sigla English) iha Munisipiu Manatutu iha Fulan Agostu tinan ne’e.

“Ita mos kria espasu ida bolu akampamentu ICT iha fulan Agostu ita sei hala’o iha Munisipiu Manatutu, akampamentu nee rasik sei moblizia joven na’in 5 kada munisipiu hodi konsentra iha ne’eba.”

Asuntun hirak ne’e hato’o husi Diretór Nasionál Kreatividade Juventude Desportu, Cesarino da Silva ba Media ONE Timor iha nia knaar fatin Leside, Kuarta, (27/07/2022).

Diretór Nasionál Kreatividade ne’e informa, kada Munisípiu sei lori joven na’in lima hodi konsentra iha akampamentu ne’e hodi fahe esperensia no halo kompetisaun kona-ba formasaun ICT ne’ebe mak durante sira hetan.

Diretór Nasionál Kreatividade SEJD Cesarino dehan, orasmentu ne’ebe mak SEJD prevee hodi realiza atividade akampamentu ICT Camp ne’e hamutuk dolar Amerikanu 33.699 USD.

Cesarino haktuir, tuir planu ba atividade akapamentu ICT Camp ne’e sei realiza iha terseira semana fulan Agostu tinan ne’e, no dadaun ne’e preparasaun la’o hela no aprosimasaun ho Sentru Juventude Munisípiu Manatutu hodi identifika fatin.

Cesarino dehan, atividade akampamentu ne’e envolve joven sira, hodi halo fali aprezentasaun iha akampamentu ne’e no mos kompetisaun kada munisipiu ba aprezenta iha ne’eba kona-ba rezultadu formasaun ICT ne’e, tanba sentru ida-idak iha rasik Website.

Alende ne’e Cesarino hateten, antes ne’e iha mos formsaun regular ne’ebe halo ba joven sira kona-ba formasaun ICT iha area multimedia no dezenu grafiku, hanesan uza plataforma online hodi halo publikasaun sira nia produtu ne’ebe durante sira halo iha Munisípiu ida-idak nian.

Alende ne’e mos hanorin sira kona-ba halo web no WordPress, intensaun husi formasaun ne’e ba joven sira ne’ebe servisu iha sentru juventude inklui jestor sira. Hodi halo publikasaun ka promosaun kona-ba atividade sira iha Sentru Juventude.

Tanba ne’e mak formasaun ida ne’e hahu iha tinan kotuk to’o agora fo nafatin formasaun no mos materia ne’ebe mak hanesan para bele garante katak sira ne’e kompreende duni, hateten Cesarino. (Asesu Youtube/Facebook https://www.facebook.com/Media1Timor Media ONE Timor)