(Reportájen Asistente Editor Marcelino Tomae)
DILI (Media ONE Timor) — Udan monu ona mai rai. Kapitál Dili ne’ebé nakonu ho fo’er sempre hamosu inundasaun iha fatin-fatin, tanba fo’er intipidu iha baleta sira. Nune’e, reprezentante povu iha uma fukun Parlamentu Nasionál (PN) husu atu solusiona trainazen sira.
“Tanba Estadu Amerika (US) apoiu ona milliuan 420 USD, maka ami Komisaun E rekomenda atu Governu implementa lalais hodi solusiona trainazen sira iha Dili laran”, hatete Prezidente husi komisaun ‘E’, trata asuntu infraestrutura Deputadu José Vas Concelhos ba Jornalista iha resintu Uma fukun PN, Kuarta, (21/09/2022).
Deputadu José hatete, PN aprova ona rezolusaun para hadia trainazen no baleta iha Dili laran. No US tau ona osan milliaun 420 USD, ne’ebé hetan ona aprovasaun husi sira nia deputadu.
Aliende osan hosi US, Deputadu José hatutan, hosi Governu Timor-Leste (TL) tau tan osan millaun 64 USD. Totál ho osan 420 USD no osan millaun 64 USD maka hamutuk osan millaun 484 USD, sei uza hodi halo trainazen no hadia baleta iha Kapitál Dili.
Maske TL sei hasoru problema barak maibé Deputadu José informa, hosi osan ne’ebé boot ne’e Governu sei solusiona hotu. No programa tenke la’o lalais. Tanba fo’er iha Dili laran kontamina ona ho bee moos.
“Ita nia sidade Dili agora kloot ona. Ema balun halo uma iha foho lolon. Balun seluk Governu planu sei muda ba Hera no Metinaro. Nune’e Governu sei dezeña didiak bee dalan iha Dili laran”, esplika Deputadu José. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.