(Reportájen Asistente Marcelino Tomae/Editora Suzana Cardoso)

Dili (Media ONE Timor) – Hafoin Tribunál Rekursu (TR) konsidera biliaun ida (U$1000,0000,000-Red) hosi Orsamentu Jerál Estadu (OJE) tinan 2023 ho totál biliaun 3,16 USD ne’e inkonstitusionál maka Prezidente Republika (PR) José Ramos Horta promulga de’it billiaun 2,16 USD.

Tuir PR Ramos Horta no Vice Prezidente Parlamentu Nasionál (PN) Deputada Maria Angelina Sarmento Lopes  ba Jornalista iha fatin diferente hateten, hosi OJE tinan 2023 ho totál biliaun 3,16 USD ne’e, dolar biliaun ida ne’ebé aloka ba veteranu sira maka konsidera inskonstitusionál.

Esplika PR José Ramos Horta ba Jornalista iha Palásiu Prezidensiál Nicolau Lobato Bairu Píte,  Kinta, (15/12/2022) katak, molok halo promulgasaun ba OJE tinan 2023 nian konsulta ona ho TR kona-ba  fundu veteranu nian ho totál dolar billiaun ida ne’ebé monu tiha ona.

“Ha’u promulga tiha ona. Maibé, tanba fundu veteranu nian monu hodi fó impaktu ba orsamentu jerál tuun tiha ba bilaun 2,16 de’it, maka ha’u mós konsulta ho Prezidente Tribunal Rekursu. No sira dehan bele promulga maka ha’u moos promulga ona,” deklara PR Ramos Horta.

Dehan Xefe Estadu, fundu veteranu mak monu ka hasai tiha. Maibé orsamentu seluk la monu. Nune’e bele halo promulgasaun ba orsamentu biliaun 2,16 para governu bele prepara nia ezekusaun, hahú iha loron 01 fulan Janeiru tinan 2023.

PR Ramos Horta konsidera kriasaun fundu ba Kombatente Libertasaun Nasionál (CLN-sigla Portugues) iha OJE 2023 ho montante dollar billaun ida,  TR deklara ona katak  la bazea ba Konstituisaun Repúblika Demokrátika Timor-Leste (KRDTL). Nune’e, konsidera inkonstitusionalidade.

Hanesan publika tiha ona iha mídia  katak, PR Ramos Horta duvida  ho fundus veteranu nian ho total dolar biliaun ida ne’ebé prevee husi OJE tinan fiskál 2023. Nune’e, PR Ramos Horta husu ba TR atu halo fiskalizasaun abstrata. Fiskalizasaun preventiva  ba ninia konstituisionalidade.

Uza Ba Area Produtivu

Maibé tuir Vice PN Angelina ba Jornalista iha Uma Fukun PN, Tersa, (13/12/2022) nia esplikasaun, orsamentu CLN ne’ebé veta hosi PR Ramos Horta depende ba konsentimente hosi  PN hodi debate fila fali.

“Fila fali ba Parlamentu Nasionál atu fó ba deputadu  sira halo konfirmasaun votu. Loke fila fali proposta OJE 2023 nian hodi haree espesifikamente ba asuntu orsamentu ne’e. Hola fali desizaun hodi debate fila fali. Maibé, ida ne’e moos depende ba konsentimentu hosi Parlamentu Nasionál”, hatete Deputada Maria Angelina ho lian pesimista.

Nune’e hatutan Deputada Angelina, tenke hadia fila fali pedidu ne’ebé maka mai husi  Prezidente Repúblika bazeia ba  TR ninia   analiza ka ninia  fiskalizasaun preventiva ba  konstitusionáludade.

Nia esplika liutan, alokasaun dolar biliaun ida ba CLN para hakmaan gastu Estadu nian.  Tanba pezu ba Estadu todan liu ona. Entermu subsidiu ba veteranu sira no subsidiu seluk- seluk tan.

“Subsidiu ne’ebé uluk fó ba veteranu sira kada fulan simu iha banku, ne’e maka transforma sai ba fundu veteranu nian hodi jere para ajuda reseita ba Estadu. Katak, tempu ruma Ita nia fundu  la to’o ona atu sustenta Estadu, maka fundu hosi biliaun ida ne’ebé aloka ba veteran iha area produtivu sira bele sai fundu alternativu”, Deputada Angelina esplika.

Objetivu seluk Deputada Angelina argumenta, labele halo diskriminasaun ba veteranu sira ne’ebé fó ona nia kontribuisaun ba rai ida ne’e.  Maski sira nia partisipasaun tinan ida ka  tinan haat de’it, maibé sira moos iha direitu ba subsidiu veteranu nian. Maka PN tenke defini  fundu dolar billiaun ida ba veteranu ne’e.

Iha parte seluk Deputada Angelina hateten, sira husi Bankada PLP nia hanoin importante atu halo moos alterasasaun ba estatutu veteranu sira nian. Alterasaun ne’e hodi fó biban ba Estadu para valoriza veteranu sira nia partisipasaun. Dedikasaun exlusiva.

Maske valorizasaun ne’e liu hosi subsidiu, katak Deputada Angelina, tenki transforma sai produtivu. Labele fó subsidiu ida ne’ebé la jere fali  reseita ba Estadu. Maka PN aprova dolar biliaun ida iha OJE 2023 ne’e hodi Governu dezemvolve planu no politika, para veteranu sira uza ba area produtivu hodi tulun reseita ba Esradu.

“Veteranu sira  bele hetan asesu hosi dolar biliaun ida ne’e hodi transforma ba fundu produtivu  ida. Maibé, politikamente Governu maka tenke jere, para ema hotu goja iha sira nia liman rasik”, tenik Deputada Angelina.

Hanesan públika ona iha mídia sira hateten, iha loron 17 fulan Novembru tinan 2023, PN liu husi reuniaun plenária  aprova proposta lei númeru 46/V(5a) Orsamentu Jerál Estadu (OJE) tinan 2023 ho montante biliaun 3,16 USD  iha finál globál ho votu afavór 42, kontra 21 no abstensaun rua.

Proposta OJE tinan 2023 nian ne’e kompostu hosi; orsamentu administrasaun sentrál biliaun 2,8  USD ne’ebé inklui ona fundu CLN ho totál dolar biliaun ida. Orsamemtu seguransa sosiál millaun 2,357. No Rejiaun Administrativu Espesial Oe-Kussi Ambenu  (RAEOA) millaun 120 USD. (Asesu Youtube/Facebook https://www.facebook.com/Media1Timor Media ONE Timor)