(Reportajen Jornalista Estajiadu Juviano de Jesus)
Dili (www.mediaonetimor.co) – Hafoin Timor-Leste (TL) ukun an, problema boot liu hodi bolu atensaun públiku maka problema iha sistema saúde. Tanba, insidensia moras barak, fasilidade saúde seidauk naton no laiha rekursu humanu medixina iha area relevante sira.
“Dezde ukun an, problema ne’ebé boot liu iha Timor-Leste hodi bolu públiku nia atensaun maka problema iha sistema saúde. Ida ne’e tanbá problema insidensia moras barak no kuaze família hotu-hotu iha esperensia ruma ho servisu saúde iha Timor-Leste.”
Lia hirak ne’e kasu husi Sekretariu Jerál Renetil (Resistencia Nasional Dos Estudantes Timor-Leste), Joaquin Russuo Fenseca iha konferensia imprensa ne’ebé hala’o iha Sede Renetil iha Fundasaun Haburas, Segunda, (15/01/2024) hodi fó observasaun ba públiku nia perkupasaun kona-ba sistema saúde iha TL ne’ebé la’o runggu-rangga liu.
Joaquin hatete, vizibildade husi problema sira iha area saúde sa’e mak’as liu. Tinan-tinan Timor oan barak maka ba halo tratamentu saúde iha rai liur.Tambá, fasilidade saúde seidauk naton atu fó atendementu ba moras balun ne’ebé mak kompleksu.
Aliende ne’e katak Joaquin, komplikadu seluk ne’ebé prejudika sistema saúde iha TL maka rekursu humanu iha medixina ba area relevante. Nune’e, Governu RDTL (Repúblika Demokratika Timor-Leste) tenke gasta osan barak ba pasiente sira hodi ba halo tratamentu iha rai liur.
Katak Joaquin, husi deskusaun aberta ne’ebé Renetil halo ho CNC (Centro Nasional Chega) iha tinan 2023 identifika ona problema falta aksebilidade populasaun iha area remota ba fasilidade saúde. Falta ekipamentu mediku no aimoruk hodi fó atendimentu saúde ne’ebé aksivel ho kualidade ba komunidade.
“No menus rekursu humanu iha area saúde, hare husi parte kuantidade, kualidade no distribuisaun aimoruk no fasilidade ladauk naton atu garante asebilidade atu fornese atendimentu saúde ne’ebé ho kualidade ba povu tomak”, Joaquin haktuir husi deskusaun tinan 2023 nian.
Maibe problema hirak ne’e tuir Joaquin, partidu politika CNRT (Conselho Nasional de Reconstrução de Timor Leste) no PD (Partidu Demokratiku) kompromete ona atu resolve kona-ba saúde nian. Kompremete ne’e Renetil haree husi kampaña eleitorál partidu nian.
Esplika Joaquin, iha kampaña eleitorál Partidu CNRT kompromete atu dezenvolve area saúde ida ne’ebé inkluzivu ho kualiddade. Hanesan mos ho partidu PD ne’ebé kompromete atu dezenvolve seitor saúde liu husi hadia Hospitál Nasionál Guido Valadares (HNGV) no hospital iha munisipiu sira.
Maske nune’e hatan ba perkupasaun urjensia husi públiku nian, Joaquin husu ba Governu Konstituisionál da IX, liu-liu ministra saúde atu tau atensaun ne’ebé seriu ba rekursu humanu. Labele taka postu saúde iha suku sira ne’ebé sei fó atendementu direta ba povu antes mai to’o postu, munisipiu no Kapitál Dili iha HNGV.
“Husu ba Governu da sia, liu-liu ministra saúde tenki tau atensaun ne’ebé seriu ba setor saúde. Presiza aumenta rekursu humanu hodi koloka ba iha suku sira. Fó bolsa estudu ba Timor oan sira hodi bele sai doutor espesialista iha area importante sira”, Joaquin sujere hodi hatutantan.
Labele taka postu saúde sira iha munisipiu. Identifika didiak kompañia ne’ebé maka atu hatama aimoruk mai iha TL. Nune’e, labele problema tanba aimoruk ne’ebá ninia stock mamuk sedu. Tenki hatene jestaun hodi jere aimoruk labele mamuk iha armajen. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.