Aikameli Hun 200 Hetan Estragus

(Reportajen Tomas Reis/Editora Suzana Cardoso)

BAUCAU (Média ONE Timor) – Hamutuk aikameli hun 200-resin, hetan estragus hosi ema deskoñesidu iha Suku Uatuhaco’o, Postu Administrativu Venilale, Munisípiu Baucau.

“Tuir dadus ne’ebé ami rekolla ona husi Venilale, iha duni estragus aikameli. Hamutuk ho autoridade to’o tiha ona iha fatin akontesementu. Maibé seidauk hetan suspeitu ne’ebé maka estraga aikameli ne’e.”

Lia fuan ne’e kasu hosi Koordenadór Reprezentasaun Teritórial Floresta Planatasaun Indústria (FPI) Baucau, Pascoal Afonso Belo ba Média ONE Timor iha Uatulete Baucau, Tersa, (22/06/2022).

Nia esplika, akontesementu ne’e akontese iha loron 19 Juñu 2022. No husu ba na’in ba aikameli no autoridade lokál atu aprezenta keixa ba Polísia Nasionál Timor-Leste (PNTL) Munisípiu Baucau, hodi buka tuir sidadaun ne’ebé tenta estragus aikameli.

Afonso afirma, aikameli nu’udar rikusoin nasaun nian. Nune’e sidadaun sira ne’ebé hakarak atu tesi aikameli, tenke iha koñesementu, tanba lei rejime jerál floresta dekretu lei Nu.14/2017, rejime jurídiku biodiversidade, inklui mós regulamentu Untaet Nu.17.

“Deskonfia sira suku laran ne’e mak halo estragus,” nia argumenta hodi hatutan maibé dadaun ne’e sei iha prosesu verifikasaun. Entertantu guarda floresta iha Munisípiu Baucau hamutuk na’in hitu. Kada postu adminisitrativu na’in ida no destaka guarda na’in ida. (Asesu Youtube/ Facebook Média ONE Timor)