ASEAN Fó Akordu Komérsiu Ba TL

Dili (www.mediaonetimor.co) – Ministériu Negósiu Estranjeiru no Kooperasaun (MNEC) no Gabinete Ministru Koordenadór ba Asuntu Ekonómiku (MCAE) ho apoiu husi Governu Austrália hala’o workshop kona-ba “Komunidade Ekonómia ASEAN nia Akordu Komérsiu Esesíal – Elementu Savi no Implikasaun ba Timor-Leste” husi loron 20 to’o 22 Juñu 2023 iha City 8, Has-Laran, Dili, Timor-Leste.

Tuir komunikadu imprensa ne’ebé redasaun Media ONE Timor simu iha Sesta, (23/06/2023) hatete,  workshop ne’e halibur governantes ofisial sira husi sentral ho liña ministerial no mos parte interesante sira hodi hasa’e sira nia koñesimentu kona-ba Komunidade Ekónomia ASEAN nia akordu komérsiu esensíal.

Akordu komérsiu esensíal ne’e iha tolu mak hanesan; ASEAN nia Akordu Komérsiu ba Sasan (ATIGA sigla Inglés), ASEAN nia Akordu Komérsiu ba Atendimentu Servisu (ATISA sigla Inglés) no ASEAN nia Akordu Investimentu Komprehensivu (ACIA sigla Inglés).

Sei hosi komunikadu imprensa ne’e katak, ratifikasaun husi akordu esensíal tolu ne’e sei sai hanesan savi komponente ida ne’ebé mak kumpri rekerementu husi ASEAN nia Roteiro ba Timor-Leste hodi sai membru Permanente ASEAN ne’ebé aprova ona iha ASEAN nia Simeira ba dala-40 no 41 iha Novembru 2022.

Vise Ministru Komérsiu no Indústria, Domingos Antunes hateten katak, foku husi workshop ne’e mak hakarak atu introdúz savi akordu husi ASEAN nian ba partisipantes sira, partikularmente membru ekipa Komunidade Ekonómia ASEAN ne’ebé mak responsabiliza ba Timor-Leste nia integrasaun ba ASEAN, hodi forma fundasaun Komunidade Ekonómia ASEAN.

Caitlin Wilson, Austrália nia Chargé d’Affaires hateten, Austrália orgulho bele lao hamutuk ho Timor-Leste hanesan kolega no mos parseiru ida iha jornada adezaun ASEAN. Ekonomikamente, membru ASEAN sei fornese Timor-Leste hodi asesu ba merkadu ne’ebé dinamiku no dezenvolvidu. Koñesimentu ba ASEAN nia Plataforma ekonómia sei ajuda masimiza benefísiu ekonomia ASEAN no informa prioridade reforma domestika. (Asesu Youtube/Facebook https://www.facebook.com/Media1Timor Media ONE Timor)