(Reportajen Editor Marcelino Tomae)
Dili (Media ONE Timor) – Fasilita komunidade ne’ebé laiha kapasidade atu halo uma rasik maka VIII Governu Konstitusionál oferese materiál konstrusaun hodi harii uma simplis, liu husi programa Uma Kbi’it Laek (UKL).
Maibé programa ne’e hamosu kontraversiál entre Deputada Bankada CNRT (Congresso Nacional de Reconstrução de Timor), Maria Barreto ho Deputadu Bankada Khunto (Kmanek Haburas Unidade Nasionál Timoroan), Luís Roberto iha plenaria Parlamentu Nasionál (PN), Segunda, (30/01/2023).
Deputada Bankada CNRT Maria Barreto iha nia intervensaun hateten, deskonfia Partidu Khunto ne’ebé tutela hela iha VIII Governu konstitusionál nia militante balun iha Aldeia Leisu, Suku Atabae, Postu Administrativu Atabae Munsipiu Bobonaro ba foti subar sasán konstrusaun UKL nian balun.
“Ha’u nia intervensaun kona-ba Uma Kbiit Laek. Iha feto faluk ida ho naran Cristina Gusmão hela iha Aldeia Leisu, Suku Atabae. Nia moras mentál. Maibé, nia iha oan na’in tolu. Sira moos simu uma kbiit laek”, Deputada Maria hateten hodi hatutan.
Maibé oknum mililitante ida husi Partidu Khunto ho naran inisiál CP deskonfia ba foti material konstrusaun hamutuk semente saka 14 no besi baton kadeli 50 ne’ebé atu uza ba halo ai riin para konstrui UKL ba feto faluk Cristina.
Tuir informasaun ne’ebé rekolla hosi fatin akontesementu ne’ebé sasan materiál hirak ne’e lakon katak Deputada Maria, tuir ekipa PNDS (Programa Nasionál Dezemvolvimentu Suku) nia identifikasaun semente no kadeli besi beton ne’e deskonfia lakon iha loron 16 Janeiru 2023.
Deputada Maria hatutan, hafoin keixa mai PN hodi dada atensaun PNDS ba haree direta material hirak ne’e maka militante CR fó fila fali semente saku Ualu. Maibé saku neen uza tiha ona hodi halo bee possu iha Aldeia Leisu ho valor selu kolen ba CR osan 250 USD.
“Tanba Xefe Suku Atabae seidauk fó osan ne’e maka CR prende tiha material UKL ne’ebé maka Governu oferese ba feto faluk Crsitina Gusmão. Maske iha reuniaun para resolve problema ne’e, CR hateten material hirak ne’ebé nia foti ne’e hanesan impresta deit”, Deputada Maria akresenta hodi hatutan.
Maibé tuir deklarasaun hosi hosi feto faluk Cristina nia oan feto katak CR mai foti material hirak ne’e nonok de’it. La fohatene ba uma na’in. Ne’e signifika CR mai ‘na’ok’.
Hatan ba problema sasan lakon ne’e Deputadu Bankada Khunto Luís Roberto hateten material UKL nian ne’ebé lakon iha Atabae ne’e laloos. Tanba Deputada Maria Barreto temi sala nia naran.
“Hot-hotu iha diferensia polítika. Maibé atu hato’o povu nia lian iha uma fukun Parlamentu Nasionál tenke iha konfirmasaun. La’ós bosok iha públiku hodi hamosu konflitu ba komunidade sira iha baze”, Deputadu Luís hateten hodi hatan Deputada Maria nia deskonfia ba militante Partidu Khunto na’ok materiál iha Suku Atabae ne’e.
Deputadu Luís konsidera informasaun ne’ebé hato’o hosi Deputada Maria ne’e laloos. Insulta de’it Partidu Khunto. Tanba programa Partidu Khunto, PLP no Fretilin iha VIII Governu Konstituisionál para tulun komunidade sira hela iha fatin ne’ebé dignu.
“Nusa maka lideransa estrutura hosi partidu ba foti fila fali sasán sira ne’ebé maka atu fó ba ema laiha kbi’it atu halo sira nia uma rasik. Nune’e informasaun ne’ebé hato’o hosi Deputada Maria ne’e la loos. Ida ne’e nia ko’alia arbiru”, hateten Deputadu Luís ho lian hirus. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.