ETDA Sei Haruka Joven Na’in 120 Ba Brunei

(Reportajen Asistente Editor Jacinto Caet)

DILI (Media ONE Timor) — Tanba kampu traballu iha Timor-Leste minímu tebes atu joven sira servisu hodi sustenta moris, tinan 2023 East Timor Divelopment Agency (ETDA) sei haruka joverntude hamutuk na’in 120 ba servisu iha Naaun Brunei.

“Tinan oin ami hosi ETDA sei haruka estudante graduadu, hamutuk na’in 120 ba servisu iha Brunei tuir idaidak nia area”, Diretór ezekutivu ETDA, Januario Neto Moc ba Jornalista iha nia knaar fatin Fatuhada, Kuarta, (06/07/2022).

Husi planu ne’e Janurio informa, ETDA identifika ona ema na’in neen tama ona iha lista hodi ba servisu iha Brunei. Programa ne’e impoortante para fó benefisiu ba joventude sira, atu nune’e bele buka servisu hodi sustenta moris lorloron nian.

Tuir Januario, joven sira ne’ebé atu ba servisu iha Brunei la’ós identifika de’it hosi estudante maibé identifika mós joven poténsial sira iha Timor-Leste hodi ba servisu para fila mai aplika ba sosiedade nia le’et.

Diretór Ezekutivu Januario Moc apresia tebes ho kooperasn entre nasaun Brunei ho Timor-Leste atu haruka joventude ba buka moris iha ne’ebá. “Ami agradese ba ko’operasaun ida ne’e, apresia ba buat sira ne’e hotu. Presiza servisu hamutuk no mós atensaun mak’as katak joven sira hakarak aprende ne’e iha”, katak Januario Moc.

Iha fatin hanesan benefisáriu Yohanes Bosco informa, atu arranka ba servisu iha Brunei seidauk fiksu. Agradese tebes ba ETDA ne’ebé halo kooperasaun di’ak hodi ajuda joven sira atu buka moris iha nasaun avansadu sira.

“Ha’u seidauk espera atu ba tanba ha’u sei haree eskola. Ha’u mós sei halo liña koordenasaun ho dosente sira iha posibilidade karik ha’u ba atu apreende ka servisu”, dehan Yohanes.

Benefisiáriu ne’e esplika, karik atu ba servisu iha Brunei sei servisu konaba oinsá atu atende ema bainhira halo vizita no mós House Keeping oinsá prepara fatin ne’ebé di’ak ba customer bele kontente ho atendimentu ne’ebé kualidade.

Nune’e mós parte governu liuhosi sekretáriu estadu Juventude no Desportu (SEJD), reprezentante hosi diretór nasionál Kreatividade SEJD, Cesarino da Silva, informa, to’o agora seidauk simu informasun husi NGO Naun Governamental Eas Timor Development Agency (ETDA) ne’ebé haruka foin sa’e harik ne’ebé atu buka servisu iha Brunei.

“Kona-ba joven sira atu ba rai-liur SEJD seidauk halo kooperasaun , SEJD sei hahú fó formasaun ba foin sa’e sira, karik ne’e planu ETDA ninian maibé SEJD seidaik simu informasaun”, katak Cesarino.

Cesarino hateten, kona-ba apoiu hosi parte governu ne’e integradu ona iha Sekretáriu Estadu Formasaun no Empregu (SEFOPE) bainhira joven sira ba rai-liur, SEJD fasilita joven sira liuhosi formasaun. (Asesu Youtube/Facebook https://www.facebook.com/Media1Timor Media ONE Timor)