Família Kbiit Laek Na’in 407, Sai Benefisiariu ba UKL+

(Reportajen Jornalista Baukau Tomas Reis/Asistente Editor Jacinto Caet)

BAUKAU (Média ONE Timor) — Atu hamenus ki’ak iha Timor-Leste, Minsteriu Administrasaun Estatál (MAE), liuhosi Programa Nasionál Dezenvolvimentu Suku (PNDS), família Uma Kbiit Laek hamutuk na’in 407 sai benefisáriu ba programa UKL+ kategória ‘B’ iha tinan ne’e.

“UKL+ iha Baukau sai benefisiáriu pur-volta 407 kada Suku sei iha benefisiáriu 37 ne’ebé maka sei implementa iha Suku 11 iha Postu Baukau-Vila.”

Asuntu ne’e kasu husi Xefe Unidade Implementasaun Planeamentu PNDS Nasionál, Flavio Amaral ba jornalista iha salaun apuramentu Munisípiu Baukau, tersa, (05/06/2022).

Tuir Flavio Amaral, objetivu husi programa ne’e atu kontribui ka hamenus ki’ak iha Timor-Leste (TL) garante moris seguru ba uma dignu.

UKL + katégoria ‘B’, hateten Flavio Amaral, sei foka liu ba família sira ne’ebé relativamente ba rendementu ekonómia natoon ba nesesidade uma laran, maibé la sufisiente atu hadi’ak sira nia hela fatin ho dignu no seguru.

Xefe PNDS, Flavio Amaral akresenta, ba atividade sei halo de’it distribuisaun Zinku ka kalen ba benefisiariu sira ne’ebé iha ona uma permanente, maibé ho kondisaun Zinku hetan feruzen ne’ebé la seguru ona.

“UKL+B nia kritériu hosi komunidade ne’ebé ita sei konsidera nafatin hanesan UKL regular ba sira nia kondisaun sosiál, ekonómia no mós kondisaun uma rasik, ékipa tekníku sei ba halo verifikasaun uma antes deside sai benefisiariu”, Flavio Amaral esplika.

Flavio afirma, bainhira ékipa tékniku rekolla hotu dadus ba benefisiariu sei hato’o ba Administradór Postu nian hafoin apresenta ba nasionál. Tuir rejime regulatóriu dekretu lei Nu.25/2022 loron 19 fulan-maiu programa UKL+.

Benefisiariu sira sei hetan de’it zinku ka kalen laiha tan apiou seluk hanesan pregu, kona-ba pregu benefisiáriu mak kontribui. Sira sei prienxe formatu ne’ebé maka sekretáriadu tekníku PNDS prepara ona.

Orsamentu ba UKL+ ‘B’ iha teritóriu tomak ho totál fundus 12 milloens, kada uma ida pur-volta rihun ida resin (1.000 USD), maibé ekipa husi Ministériu Administrasaun Estatál (MAE) mak sei sosa materiál.

Iha fatin hanesan, Prezidente Autoridade Munisípiu Baukau, Olivio Freitas informa, programa ne’e polítika VIII Governu nian, hakarak responde problema família kbiit laek sira ne’ebé ekonomia la-sufisiente hodi harii uma dignu.

“Ne’e responde ba ema ne’ebé laiha osan atu troka kalen, tanba povu kbiit laek sosa kalen tahan ida de’it mós forsa lato’o, ha’u haree responde liu ba ema kbiit laek”, Prezidente Autoridade Munisípiu Baukau, Olivio Freitas hateten.

PAM Baukau, Olivio Freitas husu ba Xefe Suku sira servisu hamutuk ho ékipa PNDS Munisípal nian halo identifikasaun ba ema ne’ebé prezisa ajuda, karik sira ne’ebé mak iha uma ne’ebé dignu governu bele ajuda. Labele haree ba kór partidu ida-idak.

Entretantu Xefu Suku Samalari, Rui Sertório Magno Siqueria nia parte agradese ba polítika VIII Governu ne’ebé lansa tan UKL+ katégoria ‘B’ bele minimiza povu kbiit laek sira nia sofrementu iha baze.

“Hanesan autoridade ami bele ba identifika ami nia povu uma ne’ebé maka hanesan Zinku sira feruzen, parte seluk mós ami haree ida ne’ebé merese atu ajuda maka atu ba identifika, nune’e sasán sira ne’ebé Governu aloka labele monu ba sasán ne’ebé uza laloos”, katak Rui.

Xefe Suku Samalari, Rui Sertório Magno Siqueria informa, iha Suku Samalari daudaun ne’e Xefe Suku, reprezentante joventude, Xefe Aldeia, Ofisiál Polisiamentu Suku (OPS), Veteranu, inklui relijiaun halo ona verifikasaun ba benefisiáriu hamtuk na’in Ualu iha suku refere.

Entretantu Postu Baukau-Vila kompostu hosi Suku 11 mak hanesan, Suku Bahu, Bukoli, Buibau, Buruma, Kaibada, Gariuai, Samalari, Seisal, Tirilolo, Triloka inklui Uailili, ho totál populasaun hamutuk na’in 57.009. (Asesu Youtube/Facebook https://www.facebook.com/Media1Timor Média One Timor)