Hasa’e Taxa Produtu Item Ualu, La Fó Valor Ba Povu

(Reportájen Asistente Editor Marcelino Tomae/Editora Suzana Cardoso)

Dili (Media ONE Timor) –  Komunidade iha Timor-Leste hahú tinan 2023 ho tristeza. Tanba, Governu hasa’e taxa ba produtu importasaun iha item ualu.  No taxa aduaneiru importasaun sa’e husi 2,5% ba 5%.

Nune’e, tuir ofisial advokasia Forum Organizasaun Não Govermentál (Fongtil), Jorge Madeira no Diretor Ezekutivu Fongtil, Valente da Costa Pinto liu husi konferensia imprensa, ne’ebé hala’o iha Salaun Fongtil, Kaikoli, Sesta, (13/01/2023) konsidera, Governu la fó ona valor ba povu.

Ofisial advokasia Fongtil, Jorge Madeira esplika, politika VIII Governu Konstitusionál  hodi hasa’e taxa importasaun aduaneiru afeta tebes ba folin nesesidade baziku iha merkadu, iha  Orsamentu Jerál Estadu (OJE) tinan 2023.

“Hasa’e taxa ba sasan hotu, signifika Governu ida ne’e la fó ona valor ba povu. Governu hanoin-aan de’it. Osan perdiam, vensimentu no fasilidade ba sira de’it. Ba sira nia futuru de’it no sira nia jerasaun. Maibe la tau atensaun ba povu ne’ebé sira ukun hela”, Jorge dehan.

Taxa aduaneiru importansaun ne’ebé sa’e husi 2,5% ba 5%. Katak Jorge, kualker sasan ne’ebé tama Timor-Leste kona hotu taxa 5%. Aliende ne’e, Governu moos hasa’e taxa iha produtu ualu.

Jorge esplika produtu ualu ne’e mak hanesan;

1. Be’e minerál hosi dolar ida kada litru, hasa’e taxa ba dolar tolu kada litru.
2. Serveza hasa’e taxa ba dollar 2,7 kada litru.
3. Tua alcohol pursentu 4,6 hasa’e taxa ba dolar 4,5 kada litru.
4. Tintu hasa’e taxa ba dolar 4,5 kada litru.
5. Tabaku hasa’e taxa as liu ba dolar 100 kada kilo grama.
6. Kareta hasa’e taxa pursentu 10 to’o pursentu 30 husi ninia folin.
7. Kilat manu sei kona taxa pursentu 10 hosi ninia folin.

Lia fuan hanesan esplika hosi Diretor Ezekutivu Fongtil, Valente da Costa Pinto. Nia hateten, responde ba taxa sa’e ne’ebé afeita ba nesesidade baziku nia folin moos sa’e, Governu tenki utiliza sira nia instituisaun hodi kontrola ho maximu ba importador sira.

Valente sujere, istituisaun relevante tenke halo servisu barak liu iha terenu. Labele fó espasu ba faan na’in sira aproveita situasaun hodi hasa’e folin ho la iha informasaun legál. No moos buat hot-hotu tenke la’o tuir instrusaun  ne’ebé mak Governu halo.

“Ami hanoin katak implementasaun taxa ba sasan sira ne’e tuir, estimasaun Governu ba buat ne’ebe mak fó vantajen ba existensia Estadu no futuru. Maibé, moos tenke sukat kapasidade komprador. Liu-liu povu ki’ik sira. No  dezenvolvimentu ekonomia iha rai laran”,  Valente dehan.

Katak Valente,  tenke iha balansu atu hasa’e taxa. Maibé, kuandu la hadia ekonomia hosi baze maka afeita ba kapasidade kompras no komunidadela la iha kompras. Inklui, hadia pensamentu minimu ne’ebé sei nafatin U$115.00.

Tuir loloos hatutan Valente, Governu tenke kria kondisaun antes hasa’e taxa ba sasán sira ne’ebé maka konsidera hanesan prazu tiha ona  iha rai laran. Tanba seidauk iha kontrola maxímu husi Estadu  hodi halo balansu.

“Ita nia rai laran seidauk iha movimentu ne’ebé halo balansau kona-ba intervensaun merkadoria. Produsaun rai laran  moos seidauk sa’e para halo balansau. Ita sei tane ba importasaun’, Valente hatete hodi hatutan.

Taxa sa’e iha Timor-Leste. Maibé kapasidade hodi  halo kompras ba sasan ne’ebé mak konsidera baziku. Hanesan, susu been labarik sira nian, foos, supermie no aihan sira seluk tan.

“Ho ida ne’e ami husu Na’i Deputadu iha  ne’ebé tuur iha uma fukun Parlamentu Nasionál (PN)  tenke ezije Governu hodi labele ignora situasaun grave rai naruk fiskal, no foti asaun apropriadu atu implementa planu sustentavel no asegura katak planu despeza haktuir realidade Finansa Estadu. No husu ba Governu atu konsola presu nesesidade Baziku ne’ebe iha semana ida ne’e nia laran sa’e makas iha Merkadu sira”,  sujere Valente.(Asesu Youtube/Facebook https://www.facebook.com/Media1Timor Media ONE Timor)