(Reportajen Jornalista Media ONE Timor Iria Da Cunha/Estajiadu Simao dos santos)
Dili (www.mediaonetimor.co) – Konstrusaun estrada husi Postu Administrativu Alas ba to’o Wadauberek, Munisipiu Manufahi ne’ebé hetan kanselamentu husi Ministeriu Obras Públika (MOP) hetan lamentasaun husi estudante no juventude Manufahi oan sira.
Asesu Live Streaming husi Notísia ne’e: Iha Facebook Media1Timor
Liu husi Konferensia Imprensa ne’ebé hala’o iha Jardim 5 Maiu, Kuarta, (24/07/2024), fó sai ona iha Transmisaun Direta iha Facebook Media1Timor, Porta Voz estudante no juventude Manufahi oan, Robensiano Fernandes hatete, Governu nia responsabilidade ba ukun maka tenki fasilita infrastrutura iha area rurál no rumotas ba komunidade nia moris di’ak.
“Atu hadia ekonomia família maka Governu sentrál tenki iha responsabilidade hodi hadia infraestrtutura sira iha area rurál no remotas sira hodi bele fasilita moris povu nian ba merkadu ligadu ho sira nia vida ekonomia”, Robensiano dehan hodi lee komunikadu imprensa ne’e.
Hafoin ukun an tinan 22-resin katak Robensiano, Timor-Leste (TL) iha ona nia Governasaun tama ona ba dasia. Maibé, to’o agora povu Alas sei halerik nafatin ba asuntu dezemvolvimentu prinsipál sira, hanesan infraestrutra estrada ne’ebé bele tulun movimentasaun komunidade sira.
Robensiano konta katak, iha loron 14 Juñu 2024 Governu liu husi MOP hamutuk ho autoridade Munisipál Manufahi, autoridade Postu Administrativu Alas, Veteranu, Igreja, lia na’in sira no komunidade Postu Administrativu Alas lansa ona fatuk dahuluk ba projetu estrada iha Suku We Dauberek, Postu Alas.
Nune’e, Robensiano hatutan katak, komunidade haksolok tebes hodi dehan, “Moris kmanek ne’ebé povu Alas hakarak mosu mai ona. Terus, matawen, halerik no harohan tinan naruk nian iha ona resposta.”
Maibe Robensiano dehan, haksolok ne’e iha semana kotuk nakfilak fali ba tristeza. Povu Alas nia fuan moras, hafoin rona informasaun ne’ebé fó sai husi média sosiál iha Facebook Pajina Xanana Ba Ema Hotu.
“Projetu konstrusaun estrada Alas kansela. Iha Pajina ne’eba katak, informasaun ne’e rasik fó sai husi Ministru Obras Publiku katak, iha grupu Alas oan balun ne’ebé uza naran veteranu hodi ba hasoru Primeiru Ministru (PM) para bele kansela estrada refere”, Robensiano deklara hodi hatutan informasaun husi pajina Facebook ne’e.
Iha parte seluk ida husi juventude Manufahi oan, Nelson Fernandes hatete, nu’udar juventude sira la konkorda ho Governu liu husi MOP halo kanselamentu hodi impede konstrusaun estrada liga entre Alas ba Wadeberek ne’e.
“Estadu maka rende ba grupu ki’ik ne’e, signifika Estadu la-hatudu nia dignidade hanesan Estadu ne’ebé forma husi ninia; ruin, raan no mataben. Ami juventude no estudante sira prontu hein nafatin, maka laiha solusaun komunidade Alas tomak sei hasoru diretamente Primeiru Ministru, Kay Rala Xanana Gusmão hodi dehan povu Alas moos parte husi Timor-Leste”, Nelson deklara hodi hatutan.
Nune’e, juventude no estudante husi Postu Alas ba OX Governu Konstitusionál ne’ebé lideradu husi Kay Rala Xanana Gusmão atu dada fila fali nia orientasaun ne’ebé fó ona ba MOP hodi hapara projetu estrada Wedauberek, Alas ne’e.
Aliende ne’e husu Nelson lori komunidade Postu Alas nia naran husu ba Ministeru Obras Publiku (MOP) atu buka solusaun urjenti hodi resolve problema ne’e. Tanba kansela projetu estrada Wedauberek, Alas laos solusaun ne’ebé povu Alas hein no hakarak.(Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.