MEDIAONETIMOR– Tanba seidauk iha harmonizasaun diploma funsaun públiku nian maka Komisaun Funsaun Públiku (KFP) husu ba VII Governu Konstituisional atu halo uniforma ba rejimi kontratasaun ba forsa traballu.
“Oras ne’e kontratasaun lao ket-ketak. Ne’e duni presiza iha diploma ida hodi bele uniformija rejimi kontratasaun ba funsaun públiku. Liu-liu sira ne’ebé tama kategoria benz e servisu nian. No kona mós ba mapa pessoal.”
Lia fuan hirak ne’e hato’o hosi Prezidente KFP, Faustino Cardoso ba jornalista hafoin remata hasoru malu ho Primeiru Ministru (PM) VII Governu Konstituisional, Mari Bin Amude Alkatiri iha Palasiu Governu, Segunda, (09/10/2017).
Nia esplika liutan, VII Governu presiza toma konsiderasaun ba kestaun; tutela funsaun públiku ne’ebé direta hosi PM, kestaun evolusaun politika fungsaun públiku, mapa pessoal, halo harmonizasaun ba diploma sira ne’ebé maka iha ligasaun ho rejime forsa traballu ne’ebé mak regula kona-ba fungsaun públiku nomos institutu públiku.
Katak Faustino, Nasaun Timor-Leste (TL) iha instutu públiku barak. Presiza iha diploma ida atu regula didiak rejimi hirak ne’e. Liu-liu institutu públiku ne’ebé maka iha ligasaun ho funsionariu sira nian.
Nune’e mos hatutan Faustino, daun-daun ne’e rejimi kontratasaun lao ketak-ketak. Maka, presiza iha diploma ida hodi uniformija rejimi kontratasaun ba funsaun traballu. Liu-liu sira ne’ebé tama kategoria bens e serviço nian.
Aliende ne’e tuir Faustino, mapa pessoal mós presiza hetan atensaun hosi VII Governu Konstituisional. Mapa pessoal laos haré deit ba funsionariu permanente no ajentes administrasaun públika.
Maibé katak Faustino, mapa pesoal sei haré mós kona-ba pesoal kontratadu hotu-hotu. Inklui sira ne’ebé maka nomeiasaun politika iha gabinete membru guvernu sira para bele iha ideia jeral funsaun traballu ho funsaun públiku. Tanba sei fo implikasaun ba iha sustentabilidade finanseira estadu ninian.
“Hosi KFP tenki asegura funsaun públiku ho efektivu hosi politika governu nian ne’ebé halo restrutura. Hosi restrutura ne’e sei fo implikasaun ba forsa traballu. Presija halo ajustamentu iha VII Governu hodi antisipa pessoal sira ne’ebé maka realoka hosi nasional ba munisipiu,” tenik Faustino.(Reportjám Mario Lobo)
Ita nia komentariu konaba post ne'e.