(Reportagen Estajiadu Deometro Amaral Ramos/Editora Suzana Cardoso)
Dili (Media ONE Timor) – Hases hosi konflitu, Governu tenke tau asuntu joven nu’udar mega projeitu iha sira nia planu. Nune’e, Sekretariu Estadu Joventude no Desportu (SEJD) liu hosi Komisaun Reguladora Arte Marsiais (KRAM) prepara osan 2,5 milloes USD.
Tuir Prezidente KRAM Fernando Antonio da Costa, Dosente Fakuldade Siensia Politika Departementu Relasaun Internasionais Universidade Dili (Undil), Dr. Hugo Lourenço da Costa, S.Sos.M.Si, Direktor Ezekutivu Diresaun Nasionál Prevensaun Konflitu Komunitariu (DNPKK) Antonio de Deus no Diretur Ezekutivu Fundasaun Mahein (FM) Abel Amaral hateten, joventude tenke sai tarjetu importante iha prosesu dezemvolvmentu Nasaun Timor-Leste (TL) nian.
Ba Media ONE Timor iha semana daruak Fevereiru 2023 iha nia servisu fatin, Prezidente KRAM Fernando Antonio da Costa hateten, Governu prepara ona fundus hamutuk 2.5 milloes USD hodi fó ba organizasaun arte marsiais rejistadu hamutuk 18, hodi halo jestaun ba sira nia organizasaun.
Fernando esplika liutan, osan 2,5 milloes ne’e prepara ba resensiamentu membru sira. Formasaun ba formadores sira liu hosi formasaun tékniku no materia siviku. Preparasaun kompetisaun kada membru. Kria sede. No planu seluk maka sei halo esbosu lejislasaun foun ba arte marsiais.
Katak Fernando, ho jestaun ne’ebé di’ak sei eduka joven sira atu moris unidade iha paz no dame. Maibé ba konflitu ne’ebé akontese durante ne’e individu. Laiha arte marsiais ida mak hanorin nia membru sira ba halo krime. Tanba tuir KRAM nia observasaun iha konflitu ne’ebé akontese, laiha ema ida maka mai ho atributu.
“KRAM konsidera arte ne’e hanesan siensia. So ema sira ne’ebé kria konflitu ne’e mak menus koñesimentu. Laiha arte marsiais ida mak hanorin nia membru sira ba halo konflitu. Bainhira Ita observa, laiha ema ida mak mai ho atributu arte marsiais. Ne’e individu”, reforsa Prezidente KRAM ne’e.
Lia fuan hanesan hato’o hosi Dosente Undil Dr. Hugo Lourenço da Costa, S.Sos.M.Si. Nia hateten, konflitu ne’ebé akontese iha sosiedade la’os mai hosi arte marsiais. Maibé hosi indivu sira ne’ebé aproveita grupu arte marsiais hanesan fonte ida hodi atinji interese, to’o involve arte marsiais hodi akumula sira nia forsa.
Maibé atu konsolidade paz no estabilidade Dosente Hugo dehan, Governu tenke konsidera organizasaun arte marsiais ne’ebé involve maioria joven hanesan autór prinsipál ba transformasaun sosiedade ida ne’ebé livre hosi konflitu. Joven mak autór ba garantia estabilidade ba paz.
“Nune’e mak joven sira bele kontribui ba dezenvolvimentu nasionál tuir filosofia no dutrina arte marsiais, inklui arte rituál sira. Tenke investe mak’as ba setór produtividade hodi kria kondisaun ba joven sira para miniza konflitu entre sira”, Dosente Hugo haktuir.
Aproveita intervista ne’e, Dosente Hugo husu ba lider arte marsiais no rituál sira para kontrolla nia membru la’o tuir dutrina no filosofia ne’ebé iha. Husu moos ba Governu liu hosi KRAM atu kria formasaun, kapasitasaun ba membru sira hodi mentaliza mentalidade ba garantia paz no estabilidade.
“Atu konsolida paz no dame la’os de’it joven. Maibé, lider Governante sira moos tenke tau prioridade hodi kria kondisaun ba joven nia moris iha setor produtividade. Hadia kondisaun ekonomia familia. Kria kampu traballu ne’ebé sai fatór importante hodi minimiza konflitu entre joven iha TL”, Dosente Hugo hatete.
Iha sikun seluk Direktór Ezekutivu DNPKK Antonio de Deus ne’ebe hala’o dialogu rekonsiliasaun hodi servisu besik liu ba komunidade ho parseiru iha fronteira hateten, Polisia dala barak halo kapturasaun ba atribuitu arte marsiais sira nian.
Hateten Antonio, DNPKK servisu ho paseiru sira hodi halo esforsu mak’as hodi kombate konflitu iha TL. Liu hosi observasaun no investigasaun direitamente ba konflitu sira iha terenu. No sei kontrola mak’as ba atividade ne’ebé realiza hodi provoka konflitu.
Maibé, bazeia ba observasaun no investigasaun PNKK nian nota katak huun hosi konflitu ne’ebé akontese mai hosi individu. Balun konflitu tanba rai. Balun seluk konflitu tanba passadu. No dala barak konflitu akontese hosi labaraik sira ne’ebé mak seidauk iha koñesimentu klean. Liu-liu hirak ne’ebé idade entre tinan 15 to’o tinan 17.
“Joven hirak ne’e la koñese di’ak dutrina arte marsiais. Lider sira maka hatene. Maka tenke iha komunikasaun ho interesaun ne’ebé mak di’ak. Nune’e, joven sira ne’ebé involve iha arte marsiais ka arte rituál sira, rona imi nia lider sira para moris ho dame no paz hanesan ran maluk ida. Mesak Timor oan de’it”, katak Antonio hodi hatutan.
Nu’udar joven ne’ebé di’ak, tenki hahú ona ho hanoin foun hodi sai autor ba kria paz no dame. Joven sira tenke ativu hodi partisipa iha edukasaun. Tenke kapasita aan hodi matenek no moris intelektuál iha sosiedade TL para kontribui ba dezenvolvimentu nasionál.
Diretur Ezekutivu FM Abel Amaral iha nia intervista ba Media ONE Timor hateten, atu hamenus konflitu iha TL, liu-liu iha kapitál Dili maka Governu tenke; hatuur joven hanesan mega projetu iha Governu nia planu. Tenke hatuur edukasaun iha númeru um. Hadia infrastrutura baziku. No hadia kualidade edukasaun. Hosi ne’e maka bele prepara joven sira iha ba merkadu.
“Tanba, hare’e hosi konflitu sira ne’ebé mak akontese iha komunidade, ne’e la’os de’it mai hosi arte marsiais. Maibé individu ho faillansu ne’ebé afeitadu hosi frakeza atensaun ba joven sira nia moris di’ak”, Abel dehan.
Maibé tuir Abel nia observasaun, objetivu VIII Governu Konstitusionál reativa fila fali arte marsiais para kontrola membru sira. Hosi kontrola ne’e maka, numeru konflitu kumesa reduz ona iha rai laran.
“Maske nune’e, hakarak rekomenda ba lider arte marsiais atu kontrola maximu ba membru sira. Husu moos ba Governu tenke tau preoridade ba iha asuntu produtividade sira. Nune’e, maka Ita sei prepara futuru joven sira ho di’ak liutan”, Abel haklean.
Hanesan públika ona iha media nasionál balun, Presidente Repúblika José Ramos Horta iha selebrasaun loron Santo Don Bosco nian, nia husu tulun ba parte Igreja atu konsolida paz no dame iha TL. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.