Médiku La-sufisiente, HNGV Rekruta-tan Na’in 87

(Reportajen Formado Seftec  Teobursi Soriano)

 Dili (Media ONE Timor) – Pasiente aumenta ba bei-beik hodi fó impatu ba servisu mediku jerál la sufisiente iha  Hospitál Nacionál Guido Valadares (HNGV), maka Ministeriu Saúde rektruta-tan internál ba mediku jerál husi sentru saúde munisipiu hotu-hotu.

“Mediku jerál sira iha HNGV, Ita haruka ba eskola espesialista hotu iha rai liur. Nune’e mediku jerál la sufisiente. Maka, superior HNGV ko’alia ho Ministeriu Saúde atu loke  konkursu vaga internál ba médiku jerál ne’ebé husi sira estatutu permanente ho esperensia durante tinan ualu ba leten.”

Hateten Diretór Assistensia Kliniku, Dr. Marcelino Vicente Correia ba Jornalista, iha edifisiu Diresaun Klinika HNGV Dili, Tersa, (21/3/2023).

Nia esplika liutan, médiku jerál ne’ebé durante ne’e hala’o sira nia kna’ar iha HNGV fó ona oportunidade ba sira hodi haklean liutan sira nia profisaun iha area espesializada. Hasa’e sira nia kapasidade iha ida-idak nia area.

Katak Dr. Marcelino, médiku jerál ne’ebé menus fó impaktu ba atendementu pasiente sira ne’ebé as ba bei-beik. Liu-liu iha emerjensia no internamentu. Loron-loron númeru pasiente as ba bei-beik.

“Ospital Nasionál Guido Valadares iha momentu ne’e médiku jerál la sufiente atu bele ajuda mediku espesialista sira. Atende pasiente sira iha HNGV ho kama 340 no konsulta externa presiza-tan médiku jerál sira nia atendementu ho di’ak”, Dr. Marcelino dehan.

Nune’e maka Ministeriu Saúde loke vaga hodi aumenta-tan médiku jerál sira ne’ebé hala’o ona sira nia kna’ar iha minisipiu durante besik tinan ualu. Rekrutamentu ne’e la loke ba públiku maibé iha internal médiku ni’an de’it. Katak, sira ne’ebé hala’o ona servisu iha Ministeriu Saúde durante tempu naruk.

Husi vaga ne’ebé Ministeriu Saúde loke, hamutuk aplikante 133 maka konkore ba vaga ne’e. Maibe mediku jerál hirak ne’ebé priense kriteria hodi liu ba vaga ne’e hamutuk na’in 87  de’it. Sira na’in 87 ne’e maka sei destaka ba departamentu no unidade kliniku HNGV nian.

Iha sikun seluk médiku jerál, dr. Gusmão dos Santos expresa nia haksolok ba servisu foun ne’ebé realokasaun ba nia iha  Unidade Kardiologia, Departamentu Medisina Interna HNGV. Antes ne’e dr. Gusmão servisu iha ospitál referral Maliana.

“Hau sente kontente, tamba mai iha ne’e bele atende kazu moras ne’ebé barak liga ho ha’u nia esperensia iha ospitál referral. Iha servisu anterior kazu uituan. Liu-liu ho problema kardiaku. No kompara ho jestaun kazu iha HNGV difirensia boot tebes”, dr. Gusmão hatete.

Expresaun hanesan hato’o husi médiku jeral, dr. Helio Smith da Conceicão. Nia hatete, iha ambiente foun sei hasa’e liu-tan kapasidade servisu durante aprende iha munisipiu ne’ebé hasoru limitasaun iha parte; médiku espesialista no fasilidade barak maka sei menus.

“Hau agradese bele hetan oportunidade iha HNGV, tamba bele hasa’e abilidade  nu’udar médiku jerál hodi mellora servisu ne’ebé aprende ona iha munisipiu. Maibé, sei iha limitasaun parte balun”, katak dr. Helio hodi hatutan.

Iha HNGV ho fasilidade no mediku espesialista ne’ebé kompletu bele kapasita liu-tan nia  servisu husi esperensia ne’ebé iha fatin antes ni’an.(Asesu Youtube/Facebook https://www.facebook.com/Media1Timor Media ONE Timor)