(Hakerek Nain Formandu Ceftec 2023 iha Unidade Hakerek Imprensa; Agusto dos Santos, Justina Freitas Soares, Regina de Carvalho, Venancio Lopes, Medelinha Soares, Teobursi Soriano)
Dili (www.mediaonetimor.co) – Timor Leste hanesan nasaun soberana no adopta sistema demokrasia tenki respeita ema nia liberdade, inkliu liberdade imprensa no espresaun ne’ebé mak hatuur metin iha Konstituisaun RDTL artigu 40 no 41.
Liberdade ida ne’e la hakerek de’it iha konstituisaun. Maibé, liu tiha dékada ida ho balun ukun-an nian, iha loron 17 fulan Juñu tinan 2015, Prezidente Repúblika promulga dekretu lei Nu 25/2015 kona-ba kriasaun no aprovasaun Konsellu Imprensa (KI) ho ninia estatutu. Nune’e KI legalmente sai nu’udár instituisaun independente [1] no iha kompetensia juridika atu promove no asegura sidadaun hotu-hotu. Liu-liu Jornalista no orgaun komunikasaun sosiál sira nia liberdade imprensa no espresaun.
Lee Notísia Relevante: “Welcome Home” Iha Konsellu Imprensa
Kompetensia jurídika KI nian hodi promove no asegura sidadaun hotu-hotu nia liberdade imprensa no espresaun liu husi orgaun komunikasaun sosiál nu’udar kondisaun individu ida ne’ebé iha direitu atu halo desijaun autónomamente tuir vontade rasik. Nune’e filozofia define liberdade nu’udár independensia ser humana, autonomia no auto-determinasaun. Liberdade iha oi-oin; liberdade hanoin, liberdade opiniaun, liberdade expresaun, liberdade relizioja, liberdade imprensa, liberdade atu la’o ba no mai no seluk-seluk tan[2].
Liberdade oin-oin nu’udar ser humana mak sai razaun jurídika KI nian hodi garante, assegura no promove liberdade atu hato’o informasaun no livre atu harii media rasik hodi fó kontribuisaun ba dezenvolvimentu demokrasia iha Timor-Leste, hodi defende sidadaun hotu-hotu nia direitu ba informasaun ne’ebé loos, onestu, imparsiál no independente.[3]
Lee Notísia Relevante: Formandu Ceftec Vizita CI, Jornalista Tenke Iha Kapasidade
Nune’e, informador ba informasaun sira tenki iha kapasidade ne’ebé aas ba; kapasidade intelektuál, kapasidade profesionál no kapasidade tékniku nian hodi produs informasaun iha orgaun komunikasaun sosiál sira ho profesionál. Labele viola direitu sidadaun sira atu hetan informasaun ne’ebé loos, onestu, imparsiál no independente.
Maka nu’udar orgaun ne’ebé iha kompetensia jurídika, KI presiza kontrola orgaun komunikasaun sosiál sira nia públikasaun informasaun ne’ebé hala’o husi jornalista sira, liu-liu husi orgaun komunikasaun sosiál sira ne’ebé rejista legalmente tuir artigu 28 lei komunikasaun sosiál iha KI hamutuk 42. Sira ne’ebé rejistradu hamutuk; media online 13, media imprimi 7, televizaun 5, rádiu públiku 9 no rádiu komunidade 8.
Entre orgaun komunikasaun sosiál ne’ebé rejistu ona iha KI mak balun kontra lei KS no dalaruma estadu ka pesoa poderoza balun tenta atu impede servisu media no jornalista sira nian, KI uza nia kompetensia hodi halo intervensaun imediata tuir lei KS artigu 44 ne’ebé kompostu hosi alinea ‘a’ to’o ‘j’.
Iha artigu 44, alinea ‘a’ ko’alia kona-ba, KI nia kompetensia atu promove liberdade espresaun no imprensa. Tanba ne’e lei atribui kompetensia ba KI nu’udar promotor ba liberdade espresaun. Nune’e, KI kontra maka’as proposta lei kriminalizasaun demafasaun hosi ministériu justisa. Hanesan publika ona iha online Timor Post, iha loron 17 fulan Juñu tinan 2019.
Maske lei KS artigu ‘8’ no ‘9’ garante liberdade imprensa no espresaun, maibé la signifika jornalista iha liberdade absoluta atu divulga kualker informasaun konforme hakarak. Hanesan hakerek ona iha númeru lima kodigu etika jornalista Timor-Leste (5. Konfirma no verfika informasaun, rona parte hotu ne’ebé involve iha akontesementu ida atu nune’e bele halo notísia kompletu, ekilibriu, tuir loloos faktus no halo separasaun klaru entre faktu no opiniaun.)
Aliende ne’e, KI moos sei akompaña nafatin publikasaun sira tuir kompetensia iha artigu 44 alinea ‘e’ no ‘f’, signifika, jornalista sira ne’ebé publika notisia falsa ka la kumpri lei KS no Kodigu Etika Jornalista nian; sei fó sansaun sira no prosesu disiplinar hanesan hatuur iha alínea ‘c’, no iha alínea ‘d’ KI moos iha kompetensia atu hasai tiha títulu profesionál jornalista nian.
Maske KI iha ona poder juridika atu kontrola no fó sansaun ba jornalista no orgaun media komunikasaun sosiál sira, maibé iha alenea ‘g’, ‘h’ no ‘i’ iha artigu 44 obriga KI hamrik hanesan mediador entre estadu, tribunál, jornalista no orgaun media sira wainhira iha kazu ruma.
Hanesan publika ona iha online Media ONE Timor, iha edisaun, Sesta, (19/06/2023) Diretór Relasaun Institusionál no Kooperasaun, Altino Freitas esplika hodi fó ezemplu, “Jornalista ida kontra kodigu etika jornalizmu nian, bainhira ema atu lori ba tribunál, diresaun relasaun institiuisionál no informasaun sei bolu mai atu fasilita mediasaun. Ezemplu; kazu RTTL,E.P ho Burger King ne’ebé la konsege lori ba to’o tribunál. Maibé resolve de’it iha CI. No kazu seluk maka entre estudante sira iha fronteira ne’ebé maka iha problema ho jornalista RTTL.E.P.”
Atu evita kazu mosu barak liu tan, KI tenki promove liberdade imprensa no fó apoiu ba organizasaun jornalista sira nian hodi dezenvolve kompetensia; intelektual, profesionál no kompetensia téknika jornalista sira nian, tuir artigu 44 alinea ‘j’.
Nune’e, KI nia papel atu dejenvolve jornalista sira nia koñesimentu kona-ba liberdade imprensa no espresaun importante tebes. Tanba, tane aas valor demokrasia iha sosiedade nia leet. Valor demokrasia ne’e sidadaun hotu-hotu nia responsabilidade, nune’e KI presija sosialija servisu no funsaun KI nian ba sidadaun hotu-hotu, liu-liu ba eskola sira. Nune’e, foinsa’e sira koñese no hatene uza liberdade espresaun.
Koñesimentu ne’ebé klean husi sidadaun hotu-hotu, kona-ba liberdade espresaun sei haburas demokrasia iha Timor-Leste. Maka hakerek na’in sira, sujere ba KI atu kria modulu hodi uniformija ensinamentu iha fatin kursu jornalizmu nian no produsaun obra jornalistiku ho profesionál liu husi tane aas; lia loos, onestidade, imparsialidade no independente.
Aliende ne’e husu ba KI nu’udar orgaun juridiku obra jornalistiku nian, atu tau atensaun ba kritériu kompetensia, kona-ba loke kursu jornalizmu. Katak, loke kursu jornalizmu laos de’it atu hetan lukru. Maibé, tenke fó garantia katak, bele produs rekursu futuru jornalista ne’ebé kualifikadu.
“Bainhira Jornalista sira kumpriende ho di’ak, kona-ba kodigu etika jornalizmu nian maka Ita sei produs kualidade informasaun no informasaun real”, katak Diretor Executivu Interinu KI, Antonio Dias bainhira simu formandu Ceftec husi Unidade Hakerek Imprensa ba tinan 2023 nian.
Mai Ita haburas demokrasia iha Timor-Leste ho profesionál, honestu no iha kompetensia, mak sei kontribui ba valor liberdade imprensa no espresaun hodi hamenus KI nia naha. Tanba ne’e mak KI laos kontrola de’it jornalista, wainhira sira hala’o servisu. Maibé orienta futuru jornalista sira dezde sei iha prosesu aprendijajen atu sai jornalista profesionál. (Asesu Youtube/Facebook https://www.facebook.com/Media1Timor Media ONE Timor)
[1] KS, Arigu 1, alinea a
[2] Significados.com.br
[3] Cf. LCS 8&9, KEJ 1
Ita nia komentariu konaba post ne'e.