(Reportájen Formandu Ceftec Francisco Robinson Pereira)
Lautém (Media ONE Timor) – Populasaun barak maka seidauk asesu informasaun tanba torre ba Radio Televizaun Timor-Leste, Empreza Públiku (RTTL,EP) ne’ebé foin maka atinji pursentu 50%, nune’e Governu lansa tan torre.
Primeiru Ministru (PM) VIII Governu Konstitusionál, Taur Matan Ruak, akompaña husi Ministru ba Asuntus Parlamentares no Komunikasaun Sosiál (Mapkoms), Francisco Martins da Costa Pereira Jerónimo lansa ona fatuk dahuluk ba projetu konstrusaun Torre RTTL,EP iha Suku Maina II, Postu-Administrativu Lautém, Munisípiu Lautém.
“Ohin loron importante ba RTTL,EP. Tanba ohin Ita halo lansamentu iha fatin ida ne’e, hodi harii torre tolu iha Timor laran”, PM Taur hateten bainhira halo diskursu iha Suku Maina, Kinta, (23/03/2023).
Informasaun ne’ebé la to’o iha baze ne’e Xefe Governu akresenta, populasaun iha Timor-Leste (TL) la-hatene saida mak akontese iha rai laran no mundu. Maka fásil ba sira atu monu ba informasaun falsu ka hoax ne’ebé akontese hodi disturba informasaun loos ne’ebé akontese.
PM Taur hatete, importante tebes ba Governu atu harii torre hirak ne’e. No sei iha tán ba faze daruak. No metas ba iha oitavu Governu konstitusionál hakarak RTTL,EP kobre ba iha territóriu TL tomak.
Iha fatin hanesan Mapkoms Francisco hatete, politika oitavu Governu konstituisionál hakarak halo diversifikasaun ba iha área Komunikasaun Sosiál, oinsá mak bele diversifika sistema analog muda ba iha sistema dijitál.
Governante ne’ebé trata ba asuntu ne’e hakle’an, polítika ida ne’e atu adapta ba iha situasaun reál iha mundu ne’ebé ohin loron tama ona ba iha dijitál modernu ho sistema DTMB (Digital Terrestrial Multimedia Broadcast).
Aliende ne’e Mapkoms Jeronimo mós husu ba iha komunidade sira atu koopera ho kompaña hodi bele halo kontruksaun. Tanba benefisiáriu ba torre ida ne’e la’os de’it ba grupu ida ka rua, maibé ba ema hotu-hotu nia di’ak.
Entretantu Administradór Postu Lautém, Zaret Alda da Silva hato’o agradese ba Governu tanba bele harii ona torre iha nia suku. Maibé nia husu ba Governu iha futuru tenki iha liña kordenasaun ida ne’ebé di’ak antes halo obra ruma.
Partisipa iha seremónia lansamentu ne’e, Vise-Ministru Justisa, José Edmundo Caetano, Sekretáriu Estadu ba Komunikasaun Sosiál, Merício Juvinal dos Reis “Akara”, Administradór Munisípiu Lautém, Domingos Sávio, Prezidente Autoridade Munisípiu Ainaro, Leovigildo Amaral Pereira, autoridade lokál no Komunidade Postu Lautém. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.