(Reportajen Jornalista Mariquita Freitas)
Dili (www.mediaonetimor.co) – Primeiru Ministru (PM) Timor-Leste (TL), Kay Rala Xanana Gusmão hato’o agrardesementu ba Nasaun Xina ne’ebé fó ona sira nia apoiu, dezde luta ba ukun rasik an to’o prosesu dezemvolvimentu Nasaun Timor-Leste.
Tuir komunikadu imprensa ne’ebé Media ONE Timor asesu iha Sabadu, (23/09/2023) hatete, PM Xanana hato’o agradese ne’e iha enkontru bilaterál ho Prezidente Repúblika Populár Xina, Xi Jimping iha sidade Hangzhou Xina hodi hametin liutan lasu kooperasaun nasaun ne’e.
Sei nafatin husi komunikadu imprensa ne’e katak, Xina la’òs primeira ves hatene kona-ba independensia Timor-Leste nian. Maibé Xina sempre fó apoiu ba Timor-Leste durante iha situasaun ne’ebé difisil iha funu naruk nian laran.
“Depois manan tiha funu, atu estabelese kooperasaun diplomatiku difisil tebes. Tanba funu foin remata iha tinan 24. Maibé atu informa katak, Xina sempre iha ami nia fuan no agradese mòs ba oportunidade hotu ne’ebé ami hetan Senhor Prezidente,” dehan PM Xanana durante enkontru bilaterál ho PR Xi Jimping ne’e.
PM Xanana hateten, interessante teb-tebes hasoru Xefe Estadu Xina hodi troka opiniaun kona-ba relasaun bilaterál no mós kona-ba kestaun nasionál no regionál ne’ebé sai interese komum. Iha tinan 2014 nia hasoru Prezidente Xi Jimping hodi asina akordu kooperasaun TL no Xina nian nu’udar momentu ne’ebé sai meius importante ba amizade.
Apoiu Programa Bealt and Road
Aliende ne’e katak PM Xanana, dezde assina akordu ne’e parseria bilaterál iha tinan 2014 relasaun amizade di’ak teb-tebes. Entre TL ho Xina nu’udar viziñu di’ak no relasaun bilaterál ne’ebé kle’an. Hosi TL sei kontinua apoia programa bealt and road hanesan inisiativa di’ak liu atu responde ba nesesidade infrastrutura iha rejiaun Asia nian ne’e.
“Timor-Leste asume hela atu hametin liután relasaun bilaterál ba parseira estratezika ida ne’ebé mak luan liu. Timor-Leste mós hein katak, sei aumenta kooperasaun iha área oi-oin hodi permite atu kontribui ba estabilidade no dezenvolvimentu regionál no global”, PM Xanana dehan.
Enkontru TL hein ho esperansa atu asina planu kooperasaun entre Governo Repúblika Popular Xina no Governo-RDTL kona-ba promosaun konjunta ba inisiativa “Bealt and Raoad” hodi hametin no promove kooperasaun ida ne’ebe mak kualidade aas liu.
Maske la esplika klean kona-ba kooeprasaun bealt and raoad, maibé komunikadu imprensa ne’e sita ba área haat, mak hanesan; revitalizasaun industria, dezenvolvimentu infraestruturas, autosufisiensia alimentar no hadi’ak meius susbsistensia.
Lee Notísia Relevante: Atende Konvite Abertura ASIAN Games, PM Xanana Aranka Ba Xina
Iha oportunidade ne’e PM Xanana lori povu TL nia naran agradese ba Xina ninia apoiu durante pandemia COVID19 ne’ebé oferese ona aimoruk vasina Sinovac no ekipamentu hodi tulun povu TL nia luta hasoru moras ne’e.
Entretantu iha fatin hanesan, Prezidente Repúblika Populár Xina, Xi Jimping agradese no parebeniza Primeiru-Ministru Xanana no Prezidente Repúblika, José Ramos-Horta ne’ebé kontinua hetan fiar hosi povu Timor-Leste hodi kaer hikas ukun.
Prezidente Xi Jimping konsidera vizita PM Xanana ne’e sei hametin liután lasu kooperasaun bilaterál entre nasaun rua ne’e nian ne’ebé estabelese ona durante ne’e.
“Benvindu Primeiru-Ministru Xanana ne’ebé hetan fila fali fiar hosi povu hodi kaer hikas ukun. Ba oin Xina nafatin iha kooperasaun di’ak atu apoiu nafatin Timor-Leste,” dehan PR Xi Jimping hodi hatutan Xina fó garante sei apoia nafatin Governu TL hodi avansa ba dezenvolvimentu ida ne’ebé prosperu no moris iha dame nia laran.(Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.