Veteranu Baucau Barak Liu, Dadus 124.782 Sei Hetan Verikasaun

(Reportájen Jornalista Media ONE Timor Adelina Fátima)

TDili uir Dili (www.mediaonetimor.co) – Dadus veteranu na’in 124.782 ne’ebé rejistu ona iha tinan 2009, balun seidauk hetan verifikasaun sei verifika iha etape daruak hosi IX Governu konstituisionál. Verifikasaun ne’e sei hala’o iha kada postu administrativu.

Tuir konférensia imprensa husi Ministru Assuntu Kombatente Libertasaun  Nasionál (MACLN-sigla português), Gill da Costa Monteiro “Oan Soru” ho Prezidente Konsellu Kombatente Libertasaun Nasionál (CCLN-sigla português) Vidal de Jesus Riak Leman iha Salaun Maubai CCLN, Comoro, foin lalais ne’e katak,  verifikasaun ne’e sei hala’o  durante loron 51 de’it.

Maibé esplika Oan soru, hosi veteranu na’in 124.782 ne’ebé rejistu ona iha tinan 2009 ne’e, iha

VIII Governu Konstituisionál halo ona verifikasaun bá dadus hamutuk 93. 946 ka 75%. Nune’e iha etape daruak  mandatu  IX Governu Konstitusionál nian  sei kompleta de’it ho dadus 30.836 ka 25%.

“Verifikasaun dadus 2º etapa ne’ebé rejistu iha tinan 2009 kontinua fali ona. No sei hahú  iha loron 28 fulan Setembru tinan 2023 iha munisípiu hotu-hotu. Verifikasaun sei hahú  hala’o iha Postu Administrativu ida-idak tuir kalendáriu ne’ebé determina ona”, Oan Soru dehan.

Esplika Oan Soru, verifikasaun dadus veteranu sira ne’ebé rejista iha tinan 2009 bá 2⁰ etapa nian sei han tempu durante loron 51. Signifika, sei hahú iha loron 28 fulan Setembru no termina iha loron 30 fulan Novembru tinan 2023.

Kalendáriu no lista naran ba dadus na’in 30.836 Oan Soru dehan, sei taka iha sede munisipál CCLN ida-idak. Lista naran ne’ebé taka sai ne’e ba de’it naran sira ne’ebé rejistu tiha ona. No ba ema hirak ne’ebé seidauk hala’o ninia verifikasaun.

Katak Oan Soru, bá ema ne’ebé lá hetan ona validasaun sei laiha oportunidade iha períodu ikus ne’e. Nune’e, husu ba kombatente hirak ne’ebé seidauk valida tenke hakbesik an bá ekipa validasaun no aprezenta kartaun eleitorál iha momentu valida dadus. Karik la marka prezensa iha oportunidade ikus liu ida ne’e, MACLN sei konsidera hanesan eskluidu.

“Iha previzaun atu validasaun bá 2⁰ etapa ne’e sei remata iha fulan Novembru tinan ida-ne’e. Durasaun validasaun bá munisípiu ida-idak la hanesan, depende ba númeru rejistu atu valida. No validasaun sei hala’o iha postu administrativu sira, tuir ida-idak nia moris fatin”, Oan Soru afirma.

Nia dehan, iha validasaun ikus liu ida-ne’e ekipa verifikadór sei la tuun to’o suku. Tanba oportunidade iha suku liu ona. Sei konsentra de’it iha Postu Administrativu husi moris fatin kombatete nian.

Komite 12 Novembru

Oan Soru haklean kona-ba kombatente 12 Novembru 1991 nian katak, kombatente libertasaun nasionál ne’ebé rejista liu husi komite 12 Novembru no partisipa iha manifestasaun 12 Novembru, komite rasik mak sei valida tuir kalendáriu ne’ebé mak sei determina husi komite 12 Novembru no hetan  kolaborasaun ho MACLN.

Iha fatin hanesan  Prezidente CCLN, Vidal de Jesus Riak Leman hateten, bá Komisáriu CCLN no ekipa tékniku sira ne’ebé sei bá halo verifikasaun bá dadus veteranu sira iha munisípiu no postu administrativu sira husu atu kumpre misaun loloos tuir giaun ne’ebé iha no orientasaun ministériu nian.

“Buat ne’ebé ha’u atu hateten mak ida-ne’e,  kuandu imi tuun bá halo verifikasaun tenke kumpri giaun ne’ebé MACLN halo, hodi evita falsifikasaun dadus veteranu. No husu moos ba ekipa tekniku sira atu aproveita tempu ho maximu, hodi determina tuir nia tempu “, hodi hatutan.

Dadús mai titál dadus veteranu ne’ebe rezistu tuir munisipiu iha tinan 2009, koloka tuir numeru ne’ebé mak barak liu. Dadus hirak ne’eb maka hanesan tuir ne’e:

Aliende ne’e,  iha moos dadus 42 mak rejista la liu-hosi munisípiu, tanba ne’e maka seidauk verifika. Dadus veteran na’in 117 iha diaspora. Verifika ona hamutuk 41. Maibé seidauk verifika hamutuk dadus na’in 76. Maske nune’e, IX Governu Konstituisionál sei halo Verifikasaun tuir kalendariu ne’ebe termina ona. (Asesu Youtube/Facebook https://www.facebook.com/Media1Timor Media ONE Timor)