Dili (www.mediaonetimor.co) – Prezidente Repúblika (PR) Ramos Horta tuir planu sei hala’o vizita ba Nasaun Xina hodi halo kooperasaun iha área importante hirak ne’ebé fó benefisiu diretamente ba povu Timor-Leste (TL) nia moris di’ak.
Haktuir komunikadu imprensa ne’ebé redasaun Media ONE Timor asesu iha loron, Segunda, (15/07/2024) hatete, atu vizita Xefi Estadu Horta nian ne’e hala’o ho efektivu maka Xefi Governu, Kay Rala Xanana Gusmão ho Embaxadora Xina iha TL, Wang Wenli realiza diskusaun preparasaun nian.
Iha deskusaun ne’e Primeiru Ministru (PM) Kay Rala Xanana Gusmão akompaña husi Vise Primeiru-Ministru, Asuntu Ekonómiku no Ministru Turizmu no Ambiente, Francisco Kalbuadi Lay.
Deskusaun Governu TL ho embaixadora Xina iha Timor-Leste (TL), Wang Wenli ne’e hala’o iha sala enkontru Ministériu Turizmu no Ambiente, Faról, Segunda, (15/07/2024) hodi haree preparasaun iha área ekonomia, agrikultura no edukasaun.
“Ita haree hamutuk preparasaun bá kooperasaun iha área ne’ebé mak atu hahú estabelese entre Xina ho Timor-Leste,” hatete Francisco Kalbuadi Lay hanesan sita ona iha komunikadu imprensa.
Entertantu tuir planu PR José Ramos Horta sei hala’o vizita bá Repúblika Xina iha loron 27 fulan Jullu tinan 2024 ne’e nian.(Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.