Dili (www.mediaonetimor.co) – Durante ne’e, iha protesaun ba Timor-Leste nia fronteira sira. F-FDTL kolabora ho Unidade Patrullamentu Fronteira Polísia Nasionál Timor-Leste (PNTL). Aliende ne’e, iha parseria besik ho TNI no servisu Intelijénsia Indonézia nian, hodi prevene ema ka sasán tama ilegál, ho kooperasaun regulár ida liuliu intensifikadu durante períodu krítiku sira.
Tuir mai redasaun Media ONE Timor hatun kompletu Diskursu husi Sua Exelénsia Prezidente Repúblika Demokrátika Timor-Leste, Dr. José Ramos-Horta, iha okaziaun Aniversáriu Kriasaun FALINTIL ba dala-49 Kuartél-Jenerál F-FDTL, 20 Agostu 2024
Exelénsia, Senõra Prezidente Parlamentu Nasionál; Exelénsia, Señór Primeiru-Ministru;
Exelénsia, Prezidente Tribunál Rekursu;
Exelénsia sira, Ex-Titulár husi Órgaun Soberania; Distintu Deputadu sira husi Parlamentu Nasionál; Distintu Membru Governu sira;
Exelentíssimu Señór Xefe Estadu-Maiór-Jenerál FALINTIL – Forsa Defeza Timor-Leste (F-FDTL) nian;
Exelentíssimu Señor Komandante-Jerál Polísia Nasionál Timor-Leste (PNTL);
Digníssimu Prokuradór-Jerál Repúblika (PGR);
Exelentíssimu Provedoria ba Direitus Umanus no Justisa (PDHJ); Distintu Membru Korpu Diplomátiku sira.
Señora no Señor sira,
Distintu Konvidadu sira,
Veteranu no Kombatente sira ne’ebé ha’u respeita,
Ohin ita selebra Aniversáriu ba dala-49 kriasaun Forsa Armada ba Libertasaun Nasionál Timor-Leste (FALINTIL). Momentu ida-ne’e hanesan oportunidade ida atu fó onra no hanoin hikas tinan ruanulu-resin- haat luta ba libertasaun nasionál no tinan ruanulu-resin-lima harii dame, dezenvolvimentu nasionál no hametin Estadu Direitu Demokrátiku.
Omenajen ba Martir no Eroi sira
Ita fó omenajen ba mártir no eroi sira ne’ebé sakrifika sira-nia vida atu Timor-Leste bele hamriik nu’udar nasaun ida livre no independente. Entre sira ne’e, ita hanoin hikas ho respeitu kle’an Nicolau Lobato, ne’ebé ninia legadu nu’udar líder rezisténsia kontinua fó naroman ba ita-nia dalan. Ninia lideransa no sakrifísiu sai nafatin fonte inspirasaun iha ita-nia luta ba justisa no ba Timoroan hotu nia moris-di’ak.
Ita mós hanoin hikas eroi moris sira ne’ebé hanorin ita valór aten-barani, sakrifísiu no hanoin estratéjiku hodi hakat liu dezafiu boot sira. Ha’u ko’alia kona-ba Fundadór ita-nia Nasaun, Komandante-Xefe FALINTIL, Kay Rala Xanana Gusmão, maibé mós komandante sira ne’ebé akompaña nia, Major-Jenerál Taur Matan Ruak, Tenente-Jenerál Lere Anan Timur, Tenente-Jenerál Domingos Raúl “Falur Rate Laek” ka Major-Jenerál Ximenes Sabika, entre sira seluk, ne’ebé sira nia ezemplu kontinua fó korajen mai ita atu hasoru difikuldade no obstákulu daudaun nian ho determinasaun no reziliénsia.
Ita hato’o ita-nia lembransa ba sira hotu ne’ebé, hafoin fó sasin Loron Restaurasaun Independénsia Nasionál, hanesan Komandante Ma’Huno Bulerek Karathayano (Bukar) ka Júlio Sarmento da Costa (Meta-Mali), entre sira seluk, maski nune’e filahikas ona ba hamutuk ho ita-nia Aman Maromak.
Importante mós atu hanoin hikas vítima no eroi sira husi Rede Klandestina, ne’ebé nia asaun sai desizivu hodi promove kauza autodeterminasaun timoroan nian. Entre sira, ita fó onra ba matebian Fernando Lasama de Araújo nia moris no obra, nu’udar Prezidente RENETIL nian, no ita rekoñese importánsia husi líder estudante sira, ne’ebé sei moris hela, hanesan ezemplu husi Mariano Assanami Sabino Lopes, ne’ebé nia kontribuisaun sira sai esensiál ba liberdade ne’ebé ita goza ohin loron.
Papel Igreja Katólika nian
Ha’u destaka, ho respeitu kle’an, saudozu Bispu Dom Martinho da Costa Lopes nia lideransa, ne’ebé, iha momentu nakukun liu represaun nian, hasa’e nia lian hodi defende ita-nia povu, sai nu’udar sinál esperansa nian. Nune’e mós, ita fó omenajen ba Bispu Dom Ximenes Belo, ne’ebé nia korajen no kompromisu ba direitus umanus mobiliza apoiu internasionál ba ita-nia kauza.
Ita labele haluha papél esensiál amu-lulik, madre no relijioza konsagrada sira hotu nian ne’ebé, iha tinan barak nia laran, la’ós de’it oferese refujiu no protesaun ba FALINTIL, maibé liuliu, sai nu’udar fonte fiar no inspirasaun konstante ba ita hotu. Igreja Católica la’ós de’it akompaña ita-
nia luta; Igreja Católica iha sentru luta, nu’udar forsa morál no espirituál ne’ebé orienta ita ho tuba rai metin ba independénsia.
Funsaun Forsa Armada nian:
Ita selebra soldadu sira, mane no feto, sargentu no ofisiál sira ne’ebé, iha pasadu no prezente, dedika ona sira-nia moris hodi defende ita-nia integridade territoriál no soberania nasionál. FALINTIL, orijen husi Forsa Defeza Timor-Leste (F-FDTL) atuál, kontinua sai hanesan rezerva fundamentál ba liña frente hasoru ameasa interna no esterna.
Dezafiu Kontemporáneu sira:
Ita moris iha mundu ida ne’ebé kompleksu no interligadu ba beibeik. Ameasa la-konvensionál sira mosu iha momentu hotu-hotu, hosi risku teknolójiku to’o krime transnasionál, hanesan tráfiku kilat no narkótiku, krime sibernétiku, migrasaun ilegál no tráfiku umanu. Konflitu internasionál sira, hanesan iha Ukránia, Faixa Gaza, Iémen, Sudaun, liuliu iha Darfur, no funu iha Myanmar, ne’ebé kontinua ezije ita-nia atensaun.
Kontribuisaun no Parseria sira:
Ita-nia kolaborasaun ho nasaun belun sira, Austrália, Brazil, Xina, Estadus Unidus Amérika, Indonézia, Malázia, Nova Zelándia no Portugál, maka fundamentál ba dezenvolvimentu ita-nia kapasidade militár.
Misaun Sosiál no Umanitária:
F-FDTL dezempeña papél esensiál hodi mantein estabilidade no seguransa interna durante períodu sira dame nian. Serbisu iha kolaborasaun besik ho forsa no servisu seguransa sira, F-FDTL fó nia apoiu ba PNTL hodi halo patrullamentu ba área risku sira, seguransa ba eventu importante sira no orden públika durante distúrbiu sivíl no deklarasaun kalamidade públika no estadu de-sítiu nian.
Iha protesaun ba ita-nia fronteira sira, F-FDTL kolabora ho Unidade Patrullamentu Fronteira Polísia Nasionál Timor-Leste (PNTL), iha parseria besik ho TNI no servisu Intelijénsia Indonézia nian, hodi prevene ema ka sasán tama ilegál, ho kooperasaun regulár ida liuliu intensifikadu durante períodu krítiku sira.
Iha situasaun dezastre naturál no emerjénsia sira, F-FDTL hala’o knaar krusiál hodi fó tulun no asisténsia umanitária, ne’ebé inklui distribuisaun ai-han, fornesimentu médiku, evakuasaun ba ema ne’ebé kanek no operasaun buka no salva.
Kompromisu sira iha Futuru:
Ita sei kontinua apoia ita-nia antigu kombatente sira no sira-nia família ho kompromisu foun ida.
Ita iha kompromisu atu oferese servisu saúde, seguransa sosiál no garantia asesu ba uma ne’ebé dignu ka servisu báziku esensiál edukasaun nian no apoiu ba dezenvolvimentu atividade ekonómika sira.
Esforsu ida ne’e halo parte iha ita-nia vizaun ba dezenvolvimentu nasionál inkluzivu, iha-ne’ebé sidadaun ida-idak, liuliu sira ne’ebé serbí ona ita-nia rain ho aten-barani, bele buras no kontribui ba Timor-Leste nia futuru.
Konklusaun:
FALINTIL, ne’ebé ohin komemora tinan ba dala-49, moris nafatin iha timoroan tomak nia fuan no memória. Ita rekoñese militár nia papél krusiál hodi harii Timor-Leste ida ne’ebé seguru, modernu no prósperu. Mai ita halibur ita-nia esforsu sira iha luta hasoru kiak, hamlaha no inseguransa ai-han, no la’o ba oin ho determinasaun no esperansa.
Obrigado barak!
Maromak haraik bensan ba ita hotu!(Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.