Resolve Problema Sosiál, Partidu MLPM Sei Fó Subsidiu 100 USD

(Reportajem Estajiada Media ONE Timor Teotonia Neto, Marquita Freitas/Editor Marcelino Tomae)

 Dili ( Media One Timor) – Rezolve problema sosiál ne’ebé aumenta ba bei-beik hodi halo povu Timor-Leste (TL), maioria sei moris iha mukit no ki’ak, maka Partidu  Movimentu Libertasaun Povu Maubere (MLPM) husu povu atu fó votus  iha eleisaun parlamentár hodi bele luta ba moris di’ak liutan.

Promete Prezidente Partidu Politiku MLPM, Reis Cadalac ho ninia Sekretáriu Jerál, José Domingos Martins bainhira loke kampaña eleitorál tama uma-sai uma (door to door-Inglesh) iha  Bairu-Pite, Ai-Lok laran, Dili, Kuarta, (19/04/2023).

Lee Notísia Relevante: Fó Apoiu Sosiál, Deklara Vota Ba PLP

Tuir Prezidente MLPM ho númeru sorteu  14, iha eleisaun parlamentar ne’ebé sei hala’o iha loron 21 Maiu 2023, Reis Cadalac, programa perioridade  mak liberta povu husi mukit no ki’ak, bainhira povu fó fi’ar iha elisaun parlamentar 2023.

“Partidu MLPM iha hanoin boot kona-ba liberta povu maubere iha Timor-Leste. Liu-liu, liberta husi mukit no ki’ak. Tanba ne’e maka povu tenki fó fi’ar hodi hakat ba uma fukun Parlamentu Nasionál para bele luta ba povu nia moris di’ak no kualidade”,  deklara Reis Caladac.

Aliende problema sosiál mukit no ki’ak Reis Cadalac hatete, problema seluk ne’ebé Timor-oan sira hasoru maka; dezempregu, moras ne’ebé hetan beibeik maibé la-iha tratamentu di’ak no labarik barak maka la-asesu ba edukasaun ho di’ak.

Rezolve problema sosiál hirak ne’e maka Reis Cadalac promote, sei povu vota ba Partidu MLPM hodi liu bareira maka kompretidu atu investe ba agrikultura, edukasaun, saúde no peskas para bele hatama rezeita ba nasaun.

Prezidente Reis Caladac moos promote atu hasa’e salariu minimu ba funsionariu, Falintil-Forsa Deveza Timor-Leste (F-FDTL) no Polisia Nasionál Timor-Leste (PNTL) husi 170 USD ba 500 USD to’o 1,100 USD.

“Partidu MLPM liu bareiru, hakarak moos atu fó subsidiu  ba dezempregu sira, ho osan kada fulan 100 USD  ba ema ida. Fó subsídiu ba etniku hotu-hotu. Hanesan;  Mambae,  Fataluku, Galolole, Makasa’e, Baikenu, Makaleiru, Kemak no inklui lian matérna iha territóriu laran tomak”, Reis Cadalac hatete hodi hatutan.

Partidu MLPM maka  liu bareira sei  hametin Governu sentrál, harii Governu rejionál, Governu distritál no hametin liutan Governu lokál hodi nune’e bele lori osan ba besik povu. Atividade hotu-hotu labele konsentra hotu iha Dili para hariku de’it parte balun, inklui ema estranjeiru sira lalin hotu osan ba rai liur.

Iha fatin hanesan Sekretáriu Jerál Partidu MLPM, José Domingos Martins haktuir,  Partidu MLPM sei la-halo Kampaña aberta. Maibé  iha parte dahuluk sei hala’o de’it programa door to door ba eleitor besik 100 iha teritoriu tomak.

“Ami sei la-ba kampaña. Maibé ami lori programa 100 ida ne’e hodi distribui ba komunidade sira  liu husi door to door. Partidu MLPM sei tuku Ita boot sira nia odamatan hodi esplika kona-ba sira ne’ebé sei lori moris di’ak iha tinan lima mai,” José dehan.

Maske nune’e Reis Cadalac nafatin  husu hotu-hotu atu vota tuir ida-idak nia konsensia ho nafatin ezizi ba Estadu no Governu atu tenki lori povu maubere ba moris modernizasaun. Tanba dezde tinan 1975 to’o ohin loron maioria sei la’o ain tanan.

Dehan Reis Cadalac, povu Maubere tomak durante  tinan 24 fó ona votu hodi determina ukun rasik an.  Maibé,   seidauk   iha libertasaun. Povu sei ki’ak no mukit. Maka, povu maubere no Buibere sira,  keta haluha loron 21 fulan Maiu tinan 2023, vota ba MLPM  númeru sorteu 14. Vota ba modernizasaun, hodi lori  povu ba moris di’ak no dignu.

“Husu ba  povu Maubere iha Timor laran tomak, nu’udar MLPM nia forsa, MLPM nia forsa iha Ita Boot sira nia liman. MLPM nia forsa moos maka estudante, foin sa’e ne’ebé servisu laiha no liu-liu povu ai-leba sira. Mai, vota ba númeru sorteiu 14”, katak José Domingos.(Asesu Youtube/Facebook https://www.facebook.com/Media1Timor Media ONE Timor)