(Reportájen Jacinto Caet/Editora Suzana Cardoso)
DILI (Média ONE Timor) – Nu’udar nasaun ho rekursu finanseiru adekuadu ne’ebé razoavel maka simplesmente Nasaun Timor-Leste (TL) la-asetavel, ne’e faillansu boot ne’ebé lider sira presiza halo reflesaun ba faillansu durante tinan barak nia laran.
Prezidente Repúblika (PR), José Manuel Ramos Horta iha sesta (10/06/2022) hateten, TL halo ona aniversariu ba dala XX maibé Aman, Inan no Oan (komunidade-Red) sei falla iha kondisaun moris di’ak nian.
Katak PR Horta, TL iha metade husi ninia labarik sira moris iha liña pobreza nia okos (liu ema adultu sira) ho numeru mortalidade neonatál áas liu iha rejiaun. No TL nia kada labarik daruak sofre malnutrisaun hodi sai nu’udar taxa malnutrisaun ne’ebé áas datoluk iha mundu.
Nune’e katak PR Horta, tenke investe maka’as iha eletrisidade ne’ebé agora asesu ona husi ita nia povu 96.1%. Investe ona iha estrada nasionál no estrada rural. Investe Kapital Umanu. Desde tinan 2002, médiu esperansa moris aumenta ba tinan 10 liu.
Katak PR ne’ebé falta loron 10 halo idade ukun fulan ida ne’e deskreve, tinan 2002 iha doutór Timoroan na’in-20 de’it. Ohin loron iha ona doutór liu 1.100. Maibe tansá mak kompete ba dezenvolvimentu ita husik hela ita-nia oan no inan sira iha kotuk.
“Sira-nia nesesidade no kuidadu husi ita, nu’udar lider no ema ne’ebé foti desizaun polítika iha nasaun ida-ne’e, kuaze hanesan reflesaun ida liga ba aprovasaun legislasaun ne’ebé nesesáriu, no aloka orsamentu governu ne’ebé adekuadu ba populasaun 42% iha nasaun. Ida ne’e – mak ita-nia oan sira,” tenik PR Horta.
Hosi frakeza hirak ne’e PR Horta husu ba Governu, Parlamentu no Parseiru Dezenvolvimentu presiza serbisu hamutuk. Hotu-hotu sein exesaun; Governu no Opozisaun, lider Igreja Katólika no relijiaun sira seluk, setór privadu, sosiedade sívil, xefe suku, atu iha TL ida-ne’ebé laiha tan bebé mate bainhira moris, no ida-ne’ebé labarik hotu-hotu saudável, nutrisaun di’ak, aprende no seguru.
Atu atinji vizaun ida-ne’e, rekomenda ba ita-nia governu no parseiru dezenvolvimentu sira atu iha alvu ne’ebé konsentradu ba prioridade rua hanesan: Presiza redús malnutrisaun ba labarik, liuliu iha loron 1.000 dahuluk entre konsepsaun (bebé iha knotak) to’o bebé sira halo tinan daruak. Tanba tenke hatene katak, hafoin labarik halo ona tinan rua, kuaze imposivel atu reverte efetu malnutrisaun.
Prioridade daruak mak atu fornese asesu ba edukasaun pre-eskolar ba labarik hotu-hotu– atu harii baze ne’ebé forte ba ita-nia oan sira atu nune’e sira bele atinji sira-nia dezenvovlimentu pontensial tomak. labele para eskola no tenke remata sira-nia estudu.
Xefe estadu ne’e afirma, ida ne’e signifika sei la halo buat ruma posiblidade metade ba futuru jerasaun sei lakon leet de’it. Sei laiha ‘kapital umanu’ ne’ebé persija atu dezenvolve nasaun ida-ne’e, atu halo serbisu, hahú negósiu no kontribui ba dezenvolvimentu ekonomia iha TL.
No PR Horta nia prioridade daruak mak atu asegura katak labarik tinan 3 to’o tinan 5 inskreve iha pre-eskolar. Ida-ne’e, importante tanba iha tinan lima dahuluk, koneksaun neural liu miliaun ida mak forma kada segudus – ritmu ida-ne’ebé nunka bele repete fali iha ita-nia moris.
PR hateten, labarik ninia kualidade esperiénsia dahuluk halo diferensia ne’ebé krítiku bainhira sira nia kakutak dezenvolve, bele fornese baze ne’ebé forte ka fraku ba aprendizajen no komportamentu iha sira nia moris tomak.
Tanba hatutan PR Horta, dadaun ne’e labarik Timoroan 75% sira la atende pre-eskolar. Labarik tinan lima mai kraik 56% ninia saúde, aprendizajen no bem-estar psikososial la la’o ho di’ak.
Nia dehan, la persija ba do’ok hodi hatene ezemplu husi nasaun susesu sira, ne’ebé investe iha saúde no edukasaun ba labarik sira no agora aproveita retornu ba sira nia investimentu. Ezemplu, Korea do Sul.
Korea do Sul atinji susesu ne’ebé notavel iha kombinasaun entre kresimentu ekonomia ne’ebé lalais no redusaun pobreza ne’ebé signifikante.
Atinjimentu nasaun nian ne’e impresionante tebes, bainhira ita konsidera katak menus husi 25% husi sira-nia rai (nasaun) mak uza ba agrikultura ka atividade ekonomia seluk, tanba Korea do Sul iha rekursu natural ne’ebé limitadu tebes. Hanesan mós ho Timor-Leste, Korea do Sul iha esperiénsia funu sívil ne’ebé estraga maioria infrastrutura. Atinjimentu prinsipál ida husi governu Korea iha 1950 mak eradikasaun analfabetismu liuhusi expansaun instituisaun edukasaun ho lalais.
Nune’e, iha TL halo aniversáriu ba da-XX nian ne’e PR Horta husu ba lider hotu-hotu presiza halo reflesaun ba faillansu durante tinan barak.
“Iha ita-nia aniversáriu independénsia ba dala 20, ita tenke selebra duni progresu ne’ebé ita halo ona to’o agora. Maibé ho aten-brani no haraik-an, ami mós tenke refleta ami-nia faillansu”, katak PR Horta hodi refere ba lider Timoroan sira iha tempu hotu-hotu, oinsá falla ba inan no oan sira iha nasaun ida-ne’e”, PR Horta dehan. (Asesu Youtube/Facebook Media ONE Timor)
Ita nia komentariu konaba post ne'e.