Troka Lideransa Fretilin, Tenke Dialogu

(Reportajen Editor Marcelino Tomae)

Dili (www.mediaonetimor.co) – Tanba eleitu husi V kongresu Partidu Fretilin nian ne’ebé hala’o tiha ona iha loron 08 Setembru 2022 liu ba, nune’e laiha dalan atu troka  lideransa Frente Revolusionariu Timor-Leste Independente (Fretilin). Maibé tenke konvoka dialogu ba estrutura.

Informa Eis Prezidente Repúblika atuál Prezidente Partidu Frente Revolusionariu Timor-Leste Independente (Fretilin), Francisco Guterres Lu Olo no Lider  Troika Lere Anan Timur  ba Jornalista iha  resintu uma fukun Parlamentu Nasionál (PN), bainhira remata plenaria dahuluk iha periodu VI lejislatura, Kinta, (22/06/2023).

“Ha’u eleitu husi V kongresu Fretilin, foin dau-dauk ne’e. Laiha dalan atu hatuun ha’u iha dala klaran. Inklui,  Sekretáriu Jerál Fretilin, Mari Alkatiri. Ami na’in rua nia mandatu  tinan lima”, hatan Lu Olo ba jornalista sira bainhira husu kona-ba ezizensia atu halo kongresu exstra ordenariu.

Mandatu Lu Olo no Marii iha Partidu Fretilin, ne’ebé sei dura husi tinan 2022 to’o tinan 2027 ne’e, katak Lu Olo, laiha   dalan  atu hatuun lideransa atuál sira. Tanba, lideransa atuál hirak ne’e eleitu iha V lejislatura ba mandadu tinan lima.

Maibé lideransa Troika Lere Annan Timor ho diplomasia hatete, nia parte hakarak estabilidade iha Partidu Fretilin nia laran. Paz entre  lideransa ho estrutura tomak. Nune’e, lideransa atuál Partidu Fretilin nian  tenke  konvoka dialogu.

“Ba ha’u, se akontese mudansa iha Partidu Fretilin tenke ho hakmatek. Labele dehan rejignasaun  husi dalan suabel. Ita  presiza dialogu ba lideransa. Dialogu ne’e importante atu kria hakmatek iha Partidu Fretilin nia laran “, hatete Lere.

Katak Lere, marka  diferensia ne’e la’ós buat ki’ik. Tanba ne’e nia husu ba lideransa Fretilin  tenke iha dialogu. La’ós atu duni malu. No la’os moos atu desklui entre membru Fretilin. Maibé, importante maka buka dalan para dialogu, hodi hetan konsiensia ne’ebé di’ak ba militante hotu-hotu iha Partidu Fretilin.

Lere rekoñese, grupu husi José Agustinho Sequeira alias Sumotxo,  la’ós foin maka  harii. Maibé grupu ne’e harii  kleur tiha ona. “Ha’u atu rejigna an husi Fretilin, ne’e ema maka inventa. Aliened, ha’u designaan husi funu laran ba integrasaun, ha’u moos kaer metin Fretilin to’o agora”, dehan Lere. (Asesu Youtube/Facebook https://www.facebook.com/Media1Timor Media ONE Timor)