MEDIAONETIMOR-Atu rekoserva lisan Beiala sira nian maka Diresaun Centru Rekoservasaun e Dezevolvimentu das Artes Culturas (CRDAC) foti tema hela fatin Beiala sira nian hodi aprezenta iha Caravana tinan 2017.
“Ita nia Beiala sira uluk laos hela kedas iha uma diak. Maibe sira hela iha ai-leten, fatuk koak no halo uma uza tahu. Katak, bainhira ita temi lisan hirak ne’e liga kedas ho Beiala Timor ninia hela fatin. Nune’e maka CRDAC inspira hodi halo uma lisan ne’e hó modern it oan.”
Lia fuan hirak ne’e hato’o husi Diretor Nasional CRDAC, Victorino Cardoso dos Santos ba jornalista bainhira remata akompanya grupu karavana husi CRDAC nian iha Largo Lesidere, Sabadu, (03/06).
Dosente Universidade Nasional Timor Lorosa’e (UNTL) ne’e esplika liutan, CRDAC nu’udar sentru ida para preserve lisan Timor-Leste (TL). Ida husi lisan ne’e, tempu uluk Beiala sira hela iha ai-leten, fatuk koak no ikus mai halo uma ho tahu.
Husi hela fatin ne’e hatutan Dosente Vitorino, fó inspirasaun hodi kria modelu uma lisan hó modern. Husi nu’u kulit hodi halo uma modelu fatuk koak. Uza karon dezenhu fatuk. No ai-aon moris iha uma no fatuk leten hodi aprezenta iha Caravana ne’e.
Tuir observasaun Media ONE Timor (MOT) nota katak, uma modelu fatuk koak ne’e hare husi do’ok hanesan foho. Wainhira hre besik afinal uma maka halo husi nu’u kulit. Hotu-hotu nia matan hateke. Kamera telephone hotu-hotu ba deit uma ki’ik ne’ebe dada husi kareta ne’e.
Balun seluk hakbesik hodi hasa foto iha fatin ne’e. Iha parte oin hakerek UNTL. Modelu CRDAC ne’e mai husi Universidade Nasional Timor-Leste (UNTL). Instituisaun akademiku maka desenvolve siensia no teknolojia.
“Maibe liu-liu atu halo konservasaun ba kultura Timor nian. Ema hotu hare katak iha ne’e balun kaer be’e. Balun seluk dansa. Signifika, uluk ita mos iha dansa hanesan Tebe-dai,” tenik artista Senior ne’e.
Hatutan Vitorino, mensjem ikus husi aprezentasaun estudante UNTL husi hela fatin beiala sira ne’e maka foho molik. Katak, mundu agora iha mundansa klimatika hodi fo amiasa ba foho komesa molik ba bei-beik.
Tenik Vitorino, husi foho molik hela deit hali hu’un mesak ida hodi fornese be’e ba foho tomak para fo hanoin ba ema hotu-hotu para labele tesi ai. Labele estraga ai horis arbiru. Tanba be’e maran ona ita labele moris.(Reportájem José Samuel)
Ita nia komentariu konaba post ne'e.