(Reportajen Asistente Editor Marcelino Tomae)
DILI (Media ONE Timor) — Kafé sai riku soin Nasaun Timor-Leste (TL) nian, ne’ebé mak sai hanesan identidade kultural nasaun, tanba ne’e governu no estadu tenke toma atensaun hodi hafolin presu kafé iha nasionál to’o internasionál.
“Ita nia riku soin hanesan kafé ne’e nu’udar produtu integradu. Tanba ne’e kafé nu’udar identidade kultural iha nasaun Timor-Leste nian, kafé ne’e riku soin nasaun nian. Nune’e labele haluha kafé nu’udar hibriku natural, ne’e mak rejista moras ba kafé sira”.
Informasaun ne’e hato’o husi Eis Ministru Agrikultura no peskas atual Deputadu Parlamentu Nasionál Mariano Asanami Sabino Lopez ba Jornalista iha resintu Uma Fukun Parlamentu Nasionál (PN), Segunda (11/07/2022).
Eis Ministru Agrikultura atual membru PN Deputadu Asanami hatete, TL tenke orgullu kona-ba riku soin kafé. Iha tinan 1950 kafé mundu tomak mate, tanba iha kafé inan ida iha suku estadu lori fali ba iha Portugal halo peskiza barak. No fahe fali ba Afrika, Amerika Latina. Inklui ASEAN, iha Vietnam. Kafé ne’e produtu importante para atu promove liután iha mundu internasionál.
Atu hasa’e produsaun no halo reabilitasaun kafé Asanami sujere, tenke kuidadu ho didi’ak. Tanba ne’e riku soin ne’ebé importante tebtebes iha Nasaun TL, “Ita apoiu no louva tebes ba Prezidente Republika (PR) Jose Manuel Ramos Horta nia inisiativa”, Asanami dehan hodi hatutan.
Dezde Asanami sei iha Ministru agrikultura fó hatene ona katak tenke halo reabilitasaun ho orsamentu uitoan hodi hasa’e fali presu kafé nian. No dadaun ne’e prosesu ne’e la’o hela.
Deputadu ne’e husu ba governu tenke promove nafatin ho kafé, ne’ebé nu’udar identidade prinsipál iha TL, katak kuda kafé karik buras, mak kuda fali produtu sira seluk hanesan, maek, vanila, no sel-seluk tan sei moris.
Relasiona ho produtu sira seluk katak Asanami, laiha kontrariu ho kafé ne’ebé nu’udar identidade no kultura nasaun nian. Prezidente Republika Jose Manuel Ramos Horta nia inisiativa atu tau fundu ne’e, folin kafé ne’e merkadu internasionál nian.
“Hau hanesan deputadu sei halo proposta ida hodi apoiu liután atu tau fundu hodi halo estabelisimentu ba presu kafé nian, laos deit kafé nu’udar identidade kultural nasaun nian maibé moos hodi hasa’e tan produsaun kafé”, Deputada Asanami hatete.
Eis Minisnistru Agrikultura ne’e imforma tan, hanesan embaixada iha fatin-fatin no mós iha setor públiku balun, kompañia balun halai ba iha hotelaria, devia kafé Timor sai kafé prinsipál idade iha hotel refere atu lori kafé hanesan duta ida ba mundu internasionál atu konñese katak ne’e kafé TL.
“Ita ogullu tebtebes ba Nai Maromak, tanba kafé Timor nu’udar hibridu natural. Maibé presiza promove liu tan kafé sai identidade kultural iha nasionál to’o internasional”, Asanami orgullu.(Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.