Fila Hosi Brunei-Filipina, PR Ramos Horta Relata Liurai Brunei Sei Vizita TL

(Reportajen Estajiada Roberta da Cruz/Iria da Cunha)

Dili (www.mediaonetimor.co) –  Hafoin durante loron ualu halo vizita bilateral ba Nasaun Brunei Darusalam no Filipina, Prezidente Repúblika (PR), José Ramos Horta fila hikas mai, ho rezultadu  sei kunvida liurai Nasaun Brunei mai vizita  Timor-Leste (TL).

“Ha’u hasoru malu ho Liurai Brunei Darusalam. Liurai ne’e sei mai vizita Timor-Leste, tuir ajenda Timor nian. Liurai Bot nia vizita mai Timor-Leste ne’e moos ho aviaun boot liu hodi halo  la bele tuun iha ne’e. Nune’e ita sei haree asuntu ne’e ho seriedade.”

Hateten PR Ramos Horta ba Jornalista sira, iha konferensia imprensa ne’ebé hala’o iha salaun VIP, Aeroportu Nicolau Lobato, Domingu, (12/11/20203, bainhira fila hikas hosi ninia vizita ofisiál husi Nasaun Brunei Darussalam no Filipina.

Hanesan públika tiha ona katak, PR Ramos Horta sai husi Kapitál Dili iha loron 4 Novembru 2023 no iha loron 5 Novembru 2023 to’o iha Brunei Darussalam. Iha loron 08 Novembru 2023 sai husi Brunei Darussalam ba fali Filipina. No iha loron 12 Novembru 2023 to’o fila fali iha Kapitál Dili.

Bainhira sorumutu ho liurai bot Brunei Darussalam aliende ko’alia kona-ba vizita mai TL, katak PR Ramos Horta Brunei Darussalam sei apoiu atu TL ne’ebé atu tama ba ASEAN. Maske tuir planu sei tama iha tinan 2025, maibé sei adia. Tanba, TL rasik seidauk preparadu iha infrastrutura.

Hafoin remata husi Brunei Darrusalam, PR Ramos Horta aranka kedas ba Nasaun Filipina. Katak PR Ramos Horta, hanesan ho Brunei Darussalam, vizita ba Filipina ne’e moos nu’udar vizita bilateral.

Hatete PR Ramos Horta, iha sorumutu ne’e husu Filipina atu fó apoiu ho maximu iha setor investementu iha TL. Investimentu ne’ebé presiza hosi sira maka sei hari’i hotel boboot iha TL. Filipina hato’o sira nia pratidaun atu simu tan estudante Timoroan iha area mediçina.

Katak PR Ramos Horta, eskola mediçina iha Filipina  nia kualidade di’ak. Tamba sira nia eskola mediçina halo ligasaun ho mediçina sira iha Inglatera ne’ebe Timor oan mos bele ba hala’o estajiu iha Filipina. Maka, di’ak liu ba halo estajiu iha neeba.

“Filipina  moos hakarak hare prolongasaun agrikultura  liu husi SEFOPE.  Sira prontu atu kolabora mos setor saude setor agrikultura, maske presidente rasik hateten sira araska iha agrikultura  tamba udan paradu”, dehan PR Ramos Horta. (Asesu Youtube/Facebook https://www.facebook.com/Media1Timor Media ONE Timor)